,,იაცენუკის ჯგუფმა ქვეყანა მძევლად აიყვანა“ -სააკაშვილი-იაცენუკის დაპირისპირება და მოსალოდნელი ცვლილებები მთავრობაში

მსოფლიო - 14:49, 16 Feb, 2016

3541

ოდესის გუბერნატორი მიხეილ სააკაშვილი უკრაინის მთავრობაში მოსალოდნელ ცვლილებებს მედიაში გამოეხმაურა. სააკაშვილის თქმით არსენ იაცენუკის მთავრობამ ქვეყნის განვითარება შეაჩერა და მოსახლეობას და ხელისუფლების სხვა წევრებს აპოკალიფტური სცენარებით აშინებს.

„იაცენუკმა და მისმა პატარა ჯგუფმა ქვეყანა მძევლად აიყვანა, გვაშინებენ, რომ თუ ისინი არ იქნებიან, ვადამდელი არჩევნები დაინიშნება და ყველა ფინანსური დახმარება შეწყდება და წავა საერთაშორისო სავალუტო ფონდი, ნუ ვიწინასწარმეტყველებთ აპოკალიფსურ სცენარებს. დარწმუნებული ვარ ნებისმიერი ახალი მთავრობა არსებულზე უკეთესი იქნება, ახლა რაც ხდება არის სრული გაუგებრობა. 5 მინისტრი გადადგა და შემდეგ დაბრუნდა. მთავრობა არ არის დეპო, რომელიც წინ არ მიიწევს. უკრაინა სულ უნდა ვითარდებოდეს.“- განაცხადა მიხეილ სააკაშვილმა.

სააკაშვილმა მის მოსალოდნელ გაპრემიერებაზეც ისაუბრა და აღნიშნა, რომ მისი გაპრემიერების მიმართ უკრაინის მთავრობაში გარკვეული შიში არსებობს, რადგან ჰგონიათ, რომ ყველას დაიჭერს და ყველაფერს წაართმევს:

„რაც შეეხება ჩემს ამბიციებს, კონკრეტული პოსტი არ არის ჩემი ამბიცია, მე ბევრად უფრო მეტი მინდა ვიდრე უკრაინის მოქმედ პრემიერ-მინისტრს. მე მინდა თამაშის წესების შეცვლა, მინდა მივცე ახალ სახეებს საშუალება დაიკავონ სამთავრობო პოზიციები. ვიცი განწყობები უმაღლეს რადაში, მთავრობასა და პრეზიდენტის ადმინისტრაციაში. ისინი ფიქრობენ, ღმერთმა არ ქნას არჩევნები დაინიშნოს ან არსენი წავიდეს, მოვა გადარეული პოპულისტი სააკაშვილი და ყველას დაიჭერს და ყველაფერს წაართმევს. მათ ერთმანეთი ისე შეაშინეს, რომ არ მგონია მე პრემიერის თანამდებობა ვინმემ შემომთავაზოს“- განაცხადა მიხეილ სააკაშვილმა.