უკრაინის სხვადასხვა რეგიონში, მათ შორის კარპატისპირეთში, გრძელდება მოსახლეობის მხრიდან რუსული სატვირთო ავტომობილების ბლოკირება, რომლებიც უკრაინის ტერიტორიაზე ტრანზიტულ გადაზიდვებს ახორციელებენ.

როგორც ცნობილია 2016 წლის 1 იანვრიდან რუსეთმა აუკრძალა უკრაინას თავისი ტერიტორიის გამოყენება სატრანზიტო გადაზიდვებისთვის ყაზახეთში. უკრაინას დღემდე საპასუხო ზომები არ მიუღია, თუმცა, მოსახლეობა რუსეთის ამ გადაწყვეტილებას ამ ფორმით პასუხობს.

ამ საკითხთან დაკავშირებით კარპატისპირეთის საოლქო ადმინისტრაციის ხელმძღვანელმა გენადი მოსკალმა ქვეყნის მთავრობას ოფიციალური პასუხი მოსთხოვა. იგი ითხოვს, რომ უკრაინის მინისტრთა კაბინეტმა საგანგებო სხდომაზე მიიღოს გადაწყვეტილება, ოფიციალურად აკრძალოს ან დაუშვას მათი გადაადგილება ქვეყნის ტერიტორიაზე.

მან აღნიშნა, რომ მიუხედავბად მოსახლეობის პროტესტისა, უშუალოდ უკრაინა-ევროკავშირის საზღვარზე ექსცესებს ადგილი არ აქვს = 14 თებერვალს ერთი რუსული სატვირთო რუმინეთის, ხოლო ორი სლოვაკეთის ტერიტორიაზე გავიდა. თუმცა, ეს ის ავტომანქანებია, რომლებმაქც დოკუმენტაციის გაფორმება პარასკევს დაწყებულ აქციამდე მოასწრეს.

"აქ სხვა პრობლემაა, რუმინეთიდან, სლოვაკიიდან და უნგრეთიდან, უკრაინის გავლით, რუსული ავტომობილების დიდი ნაკადი მოემართება," - აცხადებს გუბერნატორი.

ამ აქციების საპასუხოდ, რუსეთმა სატვირთო ავტომობილების გადაადგილება უკრაინის ტერიტორიაზე დროებით შეაჩერა, სანამ უკრაინის ხელისუფლება კონკრეტულ გადაწყვეტილებას არ მიიღებს.