რესპუბლიკური პარტია მოძრაობა „ლაზარე“-სგან ბოდიშის მოხდას ითხოვს

საზოგადოება - 17:24, 29 Mar, 2013

932

ამის შესახებ პარტიის ოფიციალურ განცხადებაშია ნათქვამი.

განცხადების თანახმად, 29 მარტს ერთ-ერთმა საინფორმაციო სააგენტომ გაავრცელა მოძრაობა "ლაზარეს" ოფიციალური განცხადება, სადაც ნათქვამია, რომ ხარების დღეს თინა ხიდაშელი "იაღოველთა კონგრესს" ატარებს.

რესპუბლიკური პარტია მოითხოვს, რომ საზოგადოებრივმა მოძრაობა "ლაზარემ" დაუყოვნებლივ მოიხადოს ბოდიში რესპუბლიკური პარტიისა და მისი ერთ-ერთი ლიდერის, თინა ხიდაშელის შესახებ ცრუ ინფორმაციის გავრცელებისა და საზოგადოების შეცდომაში შეყვანისათვის.

შეგახსენებთ, რომ 29 მარტს საინფორმაციო სააგენტო "ნიუპოსტმა" საზოგადოებრივი მოძრაობა "ლაზარეს" განცხადება გაავრცელა, რომელიც ამავე ორგანიზაციის "ფეისბუქის" გვერდზე იყო გამოქვეყნებული. სტატიის სათაური იყო: "მოძრაობა "ლაზარე": ხარების დღესასწაულზე თინა ხიდაშელი "იეღოველთა კონგრესს" ატარებს". განცხადების უცვლელად გამოქვეყნებას წინ უძღოდა სააგენტოს რედაქტორის ლაშა ბერულავას მიერ დართული ლიდი:

" საქართველოს კათოლიკოს-პატრიარქის ლოცვა-კურთხევით შექმნილი საზოგადოებრივი მოძრაობა "ლაზარეს" პრესცენტრი სკანდალურ განცხადებას ავრცელებს და თინა ხიდაშელს "იეღოველთა კონგრესის" ორგანიზებაში ადანაშაულებს.
"ნიუპოსტი" უცვლელად გთავაზობთ "ლაზარეს" პრესცენტრის განცხადების ტექსტს, რომელიც დაახლოებით 23:00 საათზე "ლაზარეს" "ფეისბუქის" გვერდზე გავრცელდა:"

სოციალურ ქსელ "ფეისბუქში" თინა ხიდაშელმა პრეტენზიები "ლაზარესთან" ერთად, რატომღაც, ლაშა ბერულავას მიმართაც გამოთქვა.

"ნიუპოსტი" შეახსენებს ქალბატონ თინა ხიდაშელს, რომ პოლიტიკოსის მხრიდან ჟურნალისტის მიმართ პრეტენზიის გამოთქმა მაშინ, როცა სააგენტოს მიერ "ლაზარეს" განცხადების გამოქვეყნება არ შეიძლება იყოს განხილული, როგორც მედიაში დამკვიდრებული სტანდარტების დარღვევა, გაუგებარი ფაქტია და იმედს გამოთქვამს, რომ პარლამენტის წევრი და კოალიცია "ქართული ოცნების" ერთ-ერთი ლიდერი მომავალში უფრო ყურადღებით გაეცნობა მედიაში გამოქვეყნებულ მასალებს, განცხადების ავტორ(ებ)ისა და ჟურნალისტის ერთმანეთისგან გამიჯვნის მიზნით.