აშშ-ის სახელმწიფო დეპარტამენტი საქართველოზე წერს - "პატარა სახელმწიფომ გლობალური უსაფრთხოების მხარდაჭერა გააძლიერა”

მსოფლიო - 13:25, 11 Feb, 2016

3252

აშშ-ის სახელმწიფო დეპარტამენტის ოფიციალურ ბლოგზე საერთაშორისო მისიებში მონაწილე ქართველი სამხედროების შესახებ სტატია გამოქვეყნდა.

“რამდენჯერაც ამერიკის შეერთებულმა შტატებმა სთხოვა სახელმწიფოებს, შეეტანათ წვლილი საერთაშორისო უსაფრთხოების უზრუნველყოფაში, საქართველომ თხოვნას დადებითად უპასუხა. იქნება ეს ერაყი თუ ავღანეთი, აღმოსავლეთ ევროპისა და დასავლეთ აზიის გზაჯვარედინზე მდებარე ამ პატარა სახელმწიფომ, გლობალური უსაფრთხოების მხარდაჭერა გააძლიერა” - წერს სტატიის ავტორი, აშშ-ის სახელმწიფო დეპარტამენტის სამხედრო-პოლიტიკურ საქმეთა ბიუროს ანალიტიკოსი რენი სილვა.

სტატიაში აღნიშნულია, რომ საქართველო ავღანეთში აშშ-ის შემდეგ მეორე უმსხვილესი კონტრიბუტორია, რომელმაც 2010 წლიდან ავღანეთში 12 000 ჯარისკაცი გაგზავნა. სტატიაში აღნიშნულია, რომ 2010 წლიდან 2014 წლამდე ქართველმა სამხედროებმა განახორციელეს საბრძოლო მისიები ჰელმანდი პროვინციაში აშშ-ის ძალებთან ერთად, ამჟამად კი ბაგრამის ავიაბაზას იცავენ.

„საქართველოს ურყევ ერთგულებას კი საკუთარი შეიარაღებული ძალების მსხვერპლი მოჰყვა: ავღანეთში დაიღუპა 31 ქართველი სამხედრო, 282 კი, საბრძოლო მოქმედებებში დაშავდა“ - წერს ავტორი.

„საქართველოს შეიარაღებული ძალები მსოფლიოს ყველაზე სახიფათო რეგიონებში ამერიკული ძალების მხარდამხარ სამსახურს განაგრძობს. თავის მხრივ, აშშ ეხმარება საქართველოს, იზრუნოს ბრძოლიდან შინ დაბრუნებულ ჯარისკაცებზე. 1998 წლიდან დღემდე საქართველომ საერთაშორისო სამხედრო დახმარების პროგრამის ფარგლებში 220 მილიონ დოლარზე მეტი მიიღო. აშშ-ის სახელმწიფო დეპარტამენტი აღნიშნული პროგრამის თანხებს აღჭურვილობისა და წვრთნის, აგრეთვე მრჩეველთა დაქირავებისათვის იყენებს, რათა საქართველომ დაჭრილ ჯარისკაცებზე უკეთ იზრუნოს" - ნათქვამია სტატიაში