რუსული საფრთხე: შვედეთი და ფინეთი რუსეთისგან სამხედრო თავდასხმას არ გამორიცხავს

მსოფლიო - 14:33, 09 Feb, 2016

3750

უკანასკნელ ხანებში შვედი და ფინელი სამხედრო მაღალჩინოსნები რუსული საფრთხის ზრდაზე ალაპარაკდნენ. მათი აზრით, რუსეთს ნებისმიერ დროს შეუძლია თავს დაესხას მათ ქვეყნებს ბალტიის ზღვიდან ან ჩრდილოეთიდან. ამ საფრთხის გამო შვედები და ფინელები მზად არიან გაზარდონ საკუთარი ქვეყნების სამხედრო ბიუჯეტები და აპირებენ თავისი სამხედროები ადრე დემილიტარიზებულ ზონებში გოტლანდსა და ალანდის კუნძულებზე განალაგონ.

არ გამოირიცხება, ამ ორი, დღეისთვის ნეიტრალური სტატუსის მქონე ქვეყნის NATO-სთან უფრო დაახლოება. როგორც ჩანს ბალტიის ზღვა, რომელიც მეოთხედი საუკუნის მანძილზე შორს იყო დაძაბულობის კერებიდან, ახლა კვლავ რუსეთ-დასავლეთის დაპირპირების წინა ხაზად იქცა.

NATO-ს გენერალური მდივნის იენს სტოლტენბერგის 2015 წლის დეკემბრის მოხსენებაში ნათქვამია, რომ რუსეთმა უკანასკნელ ხანებში 18 ფართომასშტაბიანი სწავლება ჩაატარა, რომელშიც 100 000-მდე სამხედრო მოსამსახურემ მიიღო მონაწილეობა. ზოგიერთ სწავლებაზე NATO-ს წევრ და მოკავშირე სახელმწიფოებზე საავიაციო ბირთვული დარტყმის მიყენების სიმულაციაც მუშავდებოდა. აღსანიშნავია, რომ მათ შორის შვედეთის ტერიტორიაც მოიაზრება. შეტევის სიმულაციისათვის გამოყენებულ იქნა ბომბდამშენები Ту-22М3 გამანაგდურებელ Су-27-ების საფარქვეშ. ეს 2013 წლის ბოლოს მოხდა.

2014 წლის აპრილში, შვედეთმა, ფინეთმა, ნორვეგიამ, დანიამ და ისლანდიამ ხელი მოაწერეს ხელშეკრულებას მჭიდრო სამხედრო თანამშრომლობის შესახებ. ეს ზოგადი დოკუმენტია, თუმცა, ორი ნეიტრალური ქვეყნის დაახლოება NATO-ს წევრ ქვეყნებთან ბევრ რამეზე მეტყველებს.

აღსანიშნავია, რომ ორივე ქვეყანაში მზადდება სამხედრო დოკუმენტები, რომლის თანახმადაც შვედეთი და ფინეთი ამცირებენ საერთაშორისო მისიებში საკუთარი ქვედანაყოფების რიცხოვნობას, რადგან მათ წინაშე მდგარი ახალი ამოცანა დგას - სამხედრო მზადყოფნის და ეროვნული თავდაცვითი პოტენციალის ამაღლება, რუსეთის მხრიდან სამხედრო თავდასხმის საფრთხის გაზრდის გამო.

საქმე მარტო სწავლებებში არ არის, რუსეთი გაღიზიანებულია ფინეთისა და შვედეთის, ისევე როგორც სერბიისა და მოლდოვას დასავლეთის სამყაროსტან და ევროატლანტიკურ უსაფრთხოების სისტემებთან დაახლოების გამო და შესაბამის ნაბიჯებს დგამს - 2016 წლის იანვარში ცნობილი გახდა, რომ რუსეთის დასავლეთის სამხედრო ოლქში სამი ახალი დივიზია ყალიბდება, დამატებით პირველ სატანკო არმიასთან ერთად, რომელიც სწორედ ჩრდილო-დასავლეთის მიმართულებით არის გადასროლილი.

სამხედროების აზრს პოლიტიკოსებიც იზიარებენ: „ჩემი აზრით, სიტუაცია იმდენად სერიოზულია, რომ თვით შვედეთმაც, რომელსაც 200 წელია არანაირ სამხედრო ქმედებებში არ მიუღია მონაწილეობა, უნდა გააცნობიეროს რუსეთის მხრიდან არსებული საფრთხე და სერიოზულად უნდა მოემზადოს შესაძლო თავდასხმისათვის,“ - განაცხადა ქვეყნის პარლამენტის თავდაცვის და უშიშროების კომიტეტის თავმჯდომარემ, ალან ვიდმანმა.

მისი აზრით, გასათვალისწინებელია საქართველოში და უკრაინაში განვითარებული მოვლენები, ასევე ის ფაქტიც, რომ დასავლეთის სანქციები, ნავთობზე ფასების ვარდნა და ეკონომიკური კრახი კიდევ უფრო აგრესიულს ხდის კრემლს.

„მოვა დრო, როდესაც პუტინი პატურ სიტუაციაში აღმოჩნდება. რთულია განსაზღვრო რას მოიმოქმედებს ის - შეეგუება მარცხს, თუ გახდება უკიდურესად აგრესიული. თუ გავითვალისწინებთ მის „ნამსახურებათა ნუსხას“ ბალტიის ქვეყნები მეორე ვარიანტისთვის უნდა ემზადონ. ჩვენ ვერც წარმოვიდგენდით, რომ რუსეთი ყირიმის ანექსიას ასე თავხედურად მოახდენდა,“ - აცხადებს BBC-სთან საუბარში შვედი პარლამენტარი პარლამენტარი.

ორივე ნეიტრალური ქვეყნა, ფინეთიც და შვედეთიც, საკუთარი ქვეყნების სამხედრო ბიუჯეტის გაზრდასთან და ბალტიის ზღვის კუნძულების მილიტარიზაციასთან ერთად აქტიურად გეგმავს NATO-ს ეგიდით გამართულ სამხედრო სწავლებეში მონაწილეობას. მათ უკვცე მიიღეს ორ სწავლებაში მონაწილეობა 2015 წელს, რამაც რუსეთი საკმაოდ გააღიზიანა.

შვედი პოლიტიკოსების ანალოგიურად, ფინეთის თავდაცვის მინისტრი აცხადებს, რომ სამხედრო მიმართულებით ქვეყნის გაძლიერება გამოწვეულია გეოპოლიტიკური სიტუაციის ცვლილებით და რუსეთის აგრესიული პოლიტიკით.

„რუსეთის პოლიტიკურ არსენალში აბსოლუტურად არ არის ე.წ. „რბილი ძალის“ გამოყენების მეთოდი. ერთადერთი ინსტრუმენტი, რომელსაც ის კარგად იყენებს არის უხეში სამხედრო ძალა და მისი დემოსტრირება, ხოლო სხვების დარწმუნება მას მხოლოდ და მხოლოდ დაშინების მეთოდის გამოყენებით შეუძლია,“ - აცხადებენ ფინეთში.