შსს-ს გენერალური ინსპექცია ბათუმში მომხდარ ფაქტთან დაკავშირებით მოკვლევას იწყებს

სამართალი - 13:59, 28 Mar, 2013

564

შინაგან საქმეთა სამინისტროს ინფორმაციით, ამ დროისთვის დადგენილია, რომ „მერსედესი“-ს მარკის ავტომანქანის მძღოლის როინ ფარტენაძის მხრიდან ადგილი ჰქონდა საგზაო მოძრაობის წესების დარღვევას. შემთხვევა ბათუმში, 28 მარტს, 11:40 საათზე, გრიბოედოვისა და გორგასლის ქუჩების კვეთაზე მოხდა, როდესაც მძღოლი არ დაემორჩილა საგზაო ნიშანს - „დაუთმე გზა" და „ტოიოტა"-ს მარკის ავტომანქანას, რომელსაც ვალერი თელია მართავდა, ავარიული სიტუაცია შეუქმნა.

შემთხვევის ადგილზე გამოცხადდა საპატრულო პოლიციის ეკიპაჟი. ორივე ავტომანქანის მძღოლი შემოწმდა ალკოტესტის მეშვეობით. ექსპერტიზის შედეგად დადგენილია, რომ „მერსედესი"-ს მძღოლი როინ ფარტენაძე ალკოჰოლის ზემოქმედების ქვეშ იმყოფებოდა, რის საფუძველზეც შესაბამისი საჯარიმო ოქმი შედგა. მძღოლი ადმინისტრაციულ სამართალდარღვევათა კოდექსის 125-ე მუხლის მე-9 ნაწილითა (მანევრირების წესების დარღვევა, რასაც საავარიო ვითარების შექმნა მოჰყვა) და 116-ე მუხლის 1-ლი ნაწილის (საჭის მართვა ალკოჰოლური სიმთვრალის დროს) თანახმად დაჯარიმდა .

შსს ამ ფაქტზე მოკლევის დასრულების შემდეგ საზოგადოებას შემთხვევის შესახებ სრულ ინფორმაციას მიაწვდის.