მომხდარი ინციდენტის შესახებ "ნიუპოსტს" თვითმხილველმა შეატყობინა, გადამოწმების შემდეგ კი გაირკვა, რომ რესპოდენტი, რომელიც ჟურნალისტებთან ინტერვიუში წალენჯიხის პოლიციის თანამშრომელთა მხრიდან მასზე განხხორციელებული ძალადობის შესახებ ჰყვებოდა, 1941 წელს დაბადებული, წალენჯიხის რაიონის სოფელ საჩინოში მცხოვრები ზაირა კატუკია იყო.

ზაირა კატუკიას ინფორმაციით, მის ახლო ნათესავსა და მას შორის საცხოვრებელ სახლთან დაკავშირებულ დავაში წალენჯიხის პოლიციის თანამშრომლები უკანონოდ და ნათესავის სასარგებლოდ ჩაერივნენ და დაშინებისა და მუქარის შემდეგ, ფიზიკური შეურაცხყოფაც მიაყენეს.

ზაირა კატუკია სწორედ მასზე ძალადობის ფაქტებზე ჰყვებოდა და ინტერვიუს მიმდინარეობის დროს მან ჟურნალისტებს სხეულის დაზიანებული ადგილებიც უჩვენა, რესპოდენტის მტკიცებით, მან დაზიანებები მაშინ მიიღო, როცა ფიზიკური შეურაცხყოფა უშუალოდ წალენჯიხის პოლიციის უფროსმა მიაყენა. პოლიციის უფროსის გარდა, ზაირა კატუკიამ მოძალადეთა შორის რიგითი პოლიციელი ზაზა შეროზიაც დაასახელა:

"ისინი მიტყამდნენ და ერთმანეთს ეუბნებოდნენ, სახეში არ დაარტყა, დაემჩნევაო", - უყვებოდა ქალი ჟურნალისტებს ზუგდიდის ცენტრში.
თვითმხილველის თქმით, ამ დროს ქუჩაში ახალგაზრდა მამაკაცი გამოჩნდა, რომელმაც ქალს მანქნაში ჩაჯდომა და ინტერვიუს შეწყვეტა უხეში ფორმით მოსთხოვა.

როგორც გაირკვა, მამაკაცი რესპოდენტის შვილი იყო. მისი გამოჩენიდან რამდენიმე წუტში შემთხვევის ადგილზე პოლიციის "პიკაპით" მივიდნენ სამოქალაქო და პოლიციის ფორმებში ჩაცმული მამაკაცები, რომლებმაც, როგორც განაცხადეს, "უწესრიგობის აღკვეთის მიზნით", ქალი იძულებით გაარიდეს კამერებს და მის შვილს მანქანაში ჩაუსვეს.

პოლიციელებმა დამატებითი კომენტარი არ გააკეთეს და შემთხვევის ადგილი მხოლოდ მას შემდეგ დატოვეს, რაც მანქანაში ჩასმული ქალი და მისი შვილი ცენტრიდან დაიძრნენ და გაუჩინარდნენ. მომხდარი ინციდენტი სხვადასხვა არხის ტელეჟურნალისტებმა გადაიღეს.

ლაშა ბერულავა