კომერციული ბანკების საკრედიტო დაბანდების მოცულობა 54.4 მლნ ლარით გაიზარდა

ბიზნესი & ეკონომიკა - 18:06, 27 Jan, 2016

1066

კომერციული ბანკების საკრედიტო დაბანდების მოცულობა (არარეზიდენტებზე გაცემული სესხების ჩათვლით), 2015 წლის დეკემბერში, წინა თვესთან შედარებით 254.4 მლნ ლარით (1.6 პროცენტით) გაიზარდა (გაცვლითი კურსის ეფექტის გარეშე 1.9 პროცენტით) და 2016 წლის პირველი იანვრისათვის 16.0 მლრდ ლარს გადააჭარბა. ამავე პერიოდში, ეროვნული ვალუტით გაცემული სესხების მოცულობა 129.2 მლნ ლარით (2.3 პროცენტით), ხოლო უცხოური ვალუტით გაცემული სესხების მოცულობა 125.2 მლნ ლარით (1.2 პროცენტით) გაიზარდა (გაცვლითი კურსის ეფექტის გარეშე ზრდამ 1.7 პროცენტი შეადგინა).

რეზიდენტი იურიდიული პირებისათვის 2015 წლის ბოლოს კომერციულ ბანკებს ეროვნული ვალუტით გაცემული ჰქონდათ 1.7 მლრდ ლარის (წინა თვესთან შედარებით 1.4 პროცენტით მეტი), ხოლო უცხოური ვალუტით - 5.5 მლრდ ლარის (9.8 პროცენტით მეტი) მოცულობის სესხი (გაცვლითი კურსის ეფექტის გარეშე 10.3 პროცენტით).

2015 წლის დეკემბრის განმავლობაში 2.1 პროცენტით ანუ 162.5 მლნ ლარით გაიზარდა რეზიდენტი ფიზიკური პირების დაკრედიტების მოცულობა და მიმდინარე წლის პირველი იანვრისათვის 7.9 მლრდ ლარი შეადგინა.

მიმდინარე წლის პირველი იანვრისათვის მთლიანი სესხების ლარიზაციის კოეფიციენტმა 35.32 პროცენტი შეადგინა. გასული წლის პირველი დეკემბრის მდგომარეობასთან შედარებით, გაცვლითი კურსის ეფექტის გამორიცხვით, მთლიანი სესხების ლარიზაცია 0.15 პროცენტული პუნქტით გაიზარდა.