კრიზისი მსოფლიო ფინანსურ ბაზარზე - ბირჟაზე აქციების ფასი ეცემა

მსოფლიო - 13:23, 21 Jan, 2016

1971

მსოფლიო ფინანსურ ბაზარზე კრიზისია.

დღეს დილით, აზიის საფონდო ბირჟაზე ვაჭრობა აქციებზე ფასების ვარდნით დაიწყო. ამას წინ უძღოდა ინდექსების ვარდნა ნიუ იორკის საფონდო ბირჟაზე, სადაც დოუ ჯონსის მაჩვენებელმა 1. 56 პროცენტით დაიწია.

კრიზისი ნავთობის ფასის ვარდნამ განაპირობა. ერთი ბარელი საწვავის ღირებულება 2003 წლის მინიმუმამდე დაეცა და 27 დოლარს ჩამოცდა.

ნავთობის ფასის ვარდა , აშშ-ისა და ევროკავშირის მიერ ირანის წინააღმდეგ დაწესებული სანქციების მოხსნის ფონზე გრძელდება. სანქციების მოხსნის შემდეგ, ირანს უფლება აქვს საკუთარი ნავთობი საერთაშორისო ბაზარზე გაყიდოს და ფინანსური სისტემითაცისარგებლოს.

ნავთობის ფასმა მკვეთრი ცვლილება გასული წლის სექტემბერში დაიწყო. ექსპერტების განცხადებით, ფასის ვარდნის ძირითად მიზეზად - ბაზარზე ნავთობის ჭარბი მიწოდება სახელდება. ერთ-ერთ მიზეზად აშშ-ისა და ოპეკის ქვეყნების, პირველ რიგში საუდის არაბეთთან „სანავთობო ომს“ უკავშირებენ.

კრიზისი გრძელდება რუსულ ბაზარზეც, სადაც ნავთობის გაიაფების გამო უფასურდება რუბლი. დღევანდელი მოანცემებით, რუბლი ისტორიულ მინიმუმს გაუთანაბრდა. როგორც რუსული პრესა წერს, მოსკოვის ბირჟაზე 1 აშშ დოლარის ფასმა 84 რუბლი შეადგინა, 1 ევრო კი 92 რუბლი ღირს.