სააკაშვილის ვიდეო უკრაინის არმიას საფრთხეს არ უქმნის

სააკაშვილის ვიდეო უკრაინის არმიას საფრთხეს არ უქმნის - სამხედრო ექსპერტი

მსოფლიო - 16:38, 19 Jan, 2016

2392

ოდესის ოლქის გუბერნატორმა მიხეილ სააკაშვილმა მარიუპოლში დონბასში მებრძოლი ბატალიონ „შტორმის“ მებრძოლები მოინახულა. ვიზიტის ამსახველი კადრები კი ფეისბუკზე ატვირთა.

„მარიუპოლში „შტორმის“ ბიჭების სანახავად ჩამოვედი, რომლებიც აქ მსახურობენ. ცოტა ყოყმანის შემდეგ კი ვიდეოს დადება გადავწყვიტე“ - წერს სააკაშვილი ფეისბუკზე.

კადრებზე ასახულია სამხედროების საცხოვრებელი პირობები, მათ შორის საპირფარეშოები. ასევე ჩანს ორი უკრაინული საგუშაგო - ერთი გზატკეცილზე, მეორე კი რკინიგზასთან, ხიდის ქვეშ. ერთ-ერთ კადრში, კი მიხეილ სააკაშვილის უკან მარიუპოლიც რუკა ჩანს, ჯარისკაცი კი პოზიციების შესახებ ესაუბრება.

აღნიშნული კადრების გავრცელების შემდეგ, მედიაში გაჟღერდა მოსაზრება, რომ ეს უკრაინის ეროვნულ უსაფრთხოებას უქმნის საფრთხეს.

როგორც BBC-ის რუსული რედაქცია იტყობინება, ისინი ყოფილ სამხედრო-კონტრაქტორს დენის მოკრუშინს დაუკავშირდნენ და ვიდეომასალასთან დაკავშირებით კომენტარი სთხოვეს.

„ერთი პოსტი საავტომობილო გზაზე მდებარეობს, ფაქტობრივად ეს პოლიცაა ეროვნული გვარდიის ერთ-ერთ ბატალიონთან ერთად. ეს პოსტი ნებისმიერმა მძღოლმა იცის და არანაირ საიდუმლოს არ წარმოადგენს.

მეორე პოსტი რკინიგზასთან, ხიდის ქვეშ მდებარეობს . თუკი დონეცკი და ლუგანსკი დაზვერვას ადგილობრივი მოსახლეობის მეშვეობით განახორციელებს, მაშინ ეს პოსტი ფიქსირებულია და მისი ადგილმდებარეობაც არავითარ საიდუმლოს არ წარმოადგენს.

რაც შეეხება რუკას, ნაჩვენებია ქალაქის ჩვეულებრივი რუკა და სამხედროც სწორდ ამ ორ პოსტს აჩვენებს. ეს კი საიდუმლოს არ წარმოადგენს. ერთადერთი, ვიდეოში გაჟღერდა პოსტის სახელი "K" და ციფრული დასახელება. ეს კი, ალბათ არ იყო საჭირო.

სხვამხრივ, ვიდეო არაფერია განსაკუთრებული, გარდა ჯარისკაცების ცხოვრების მძიმე პირობებისა. ისინი უკვე ერთი წელია იქ იმყოფებიან და ტუალეტის ნაცვლად, სადღაც ნაგავსაყრელზე დადიან“ - აცხადებს მოკრუშინი.