გრიპის ვირუსების შემთხვევების მატება მომავალი კვირიდანაა მოსალოდნელი

ჯანმრთელობა - 19:56, 18 Jan, 2016

4991

დაავადებათა კონტროლის ეროვნული ცენტრის ინფორმაციით, გრიპის ვირუსების შემთხვევების მატება იანვარ-თებერვალშია მოსალოდნელი. ამის შესახებ განცხადება ცენტრის ხელმძღვანელმა ამირან გამყრელიძემ გააკეთა. მისი თქმით ამ მომენტისთვის 100 ათას მოსახლეზე გრიპით ინფიცირების 240 შემთხვევაზე მეტი ფიქსირდება, გრიპის ეპიდემია კი იმ შემთხვევაში გამოცხადდება, თუკი შემთხვევების რაოდენობა ყოველ 100 ათას მოსახლეზე 500-ს ინფიცირებულს გადააჭარბებს. დაავადებათა ეროვნული ცენტრი H1N1 ვირუსის გავრცელებასთან დაკავშირებითაც ავრცელებს ინფორმაციას მათი თქმით აღნიშნული ვირუსის ინტენსივობის ზრდა მომავალი კვირიდანაა მოსალოდნელი. ვირუსის ინტენსივობა კი 5-8 კვირის შემდეგ შემცირდება.

გამყრელიძე მოსახლეობას რეკომენდაციით მიმართავს, იმ შემთხვევაში თუ ტემპერატურა 38 გრადუსზე მეტი დაფიქსირდება, ასევე თავისა და სახსრების ტკივილის დროს, აუცილებლად მიმართონ ექიმს, რომელიც მათ მედიკამენტოზურ მკურნალობას დაუნიშნავს და საჭიროების შემთხვევაში მოხდება ჰოსპიტალიზაცია.

დაავადებათა კონტროლის ცენტრის ცნობით, განსაკუთრებით საფრთხეს წარმოადგინენ ქრონიკული დაავადებების მქონე ადამიანები, ორსულები და ბავშვები. ცენტრის რეკომენდაციით, მაღალი რისკის ჯგუფში შემავალი ადამიანები უნდა მოერიდონ ხალხმრავალ ადგილებს და ვირუსის სიმპტომების შემთხვევაში დაუყოვნებლივ მიმართონ ექიმს.

დაავადებათა კონტროლის ცენტრის მონაცემებით, საქართველოში გრიპის შემთხვევების გამოვლენა ყოველთვის დეკემბრის მეორე ნახევრიდან იწყება და იანვარ-თებერვალში შემთხვევის გარკვეული ზრდა ფიქსირდება.

გამყრელიძის თქმით, გრიპის ვირუსებზე 8 ათასზე მეტი პირი კერძო სამედიცინო დაწესებულებების მიერ აიცრა, ხოლო სახელმწიფოს მიერ აცრილია რისკ ჯგუფებს დაქვემდებარებული 12 ათასამდე ადამიანი.