ამერიკის შეერთებულმა შტატების სახელმწიფო მდივანმა ჯონ კერიმ და ევროკავშირის უმაღლესმა წარმომადგენელმა საგარეო პოლიტიკის საკითხებში ფედერიკა მოგერინიმ ვენაში განაცხადეს, რომ აშშ და ევროკავშირი დაუყოვნებლივ მოუხსნიან ირანს ეკონომიკურ სანქციებს, რადგან მან შეასრულა ყველა პირობა ქვეყნის ბირთვული პროგრამის დემონტაჟის საკითხში.

"იმ ნაბიჯების საპასუხოდ, რომელიც ირანმა გადადგა, აშშ და ევროკავშირი დაუყოვნებლივ მოხსნიან სანქციებს, რომელიც დაკავშირებული იყო ქვეყნის ბირთვულ პროგრამასთან," - განაცხადა ჯონ კერიმ და აღნიშნა, რომ ირანის მიერ ბირთვული იარაღის შექმნის საფრთხე საგრძნობლად შემცირდა.

"რადგან ირანმა შეასრულა ყველა ვალდებულება, დღეიდან იხსნება საერთაშორისო და ეროვნული ეკონომიკური და ფინანსური სანქციები, რომელიც ირანის ბირთვულ პროგრამასთან იყო დაკავშირებული," - განაცხადა ფედერიკა მოგელინიმ.

სანქციების მოხსნის შემდეგ ირანი მიიღებს წვდომას მის გაყინულ ფინანსურ აქტივებზე, რომელიც საზღვარგარეთაა განთავსებული. ამ აქტივების ღირებულება 50 მილიარდ დოლარს შეადგენს. ასევე ირანს შეეძლება დღეში 500 ათას ბარელამდე ნავთობის ექსპორტი განახორციელოს

დასავლეთის ლიდერების განცხადებებს თავის ტვიტერის გვერდზე გამოეხმაურა ირანის პრეზიდენტი ჰასან როუჰანი:

"მადლობა ღმერთს და ქედს ვიხრი ირანელი ხალხის მოთმინების წინაშე. გილოცავთ ამ სასახელო გამარჯვებას!" - წერს პრეზიდენტი.

სანქციების მოხსნა დადებითად შეაფასა აგრეთვე რუსეთის საგარეო საქმეთა სამინისტრომ.