იმედია, თებერვლის პირველივე კვირაში სებ-ის ანგარიშის მოსმენა მოხერხდება- გიორგი ქადაგიძე

ბიზნესი & ეკონომიკა - 10:42, 15 Jan, 2016

1442

ეროვნული ბანკის პრეზიდენტი გიორგი ქადაგიძე იმედოვნებს რომ საქართველოს პარლამენტში სებ-ის წლიური ანგარიშის მოსმენა თებერვლის პირველივე კვირაში მოხდება. ამის შესახებ სებ-ის პრეზიდენტმა გადაცემა „ბიზენესკონტაქტში“ ისაუბრა და გაკვირვება გამოთქვა იმასთან დაკავშირებით, რომ ის კანონმდებლები ვინც ეროვნულ ბანკს და მის პრეზიდენტს საგამოძიებო კომისიის შექმნით ემუქრებოდნენ, დღეს წლიური ანგარიშის მიმართ ინტერესს არც გამოხატავენ:

„საკმაოდ გაკვირვებული დავრჩი როდესაც საფინანსო-საბიუჯეტო კომიტეტის თავმჯდომარის განცხადება მოვისმინე, რომ ეს საკითხი საინტერესო აღარ არის. შეგახსენებთ, რომ ერთ წელზე მეტია საგამოძიებო კომისიის შექმნის ინიციატივით გვემუქრებიან.

უფრო სერიოზულები რომ ვიყოთ, მნიშვნელოვანი იქნება, რომ ეს ტრიბუნა მაქსიმალურად იყოს გამოყენებული, რაც პირველ რიგში, საინტერესოა მოსახლეობისა და დეპუტატებისთვის. იმ ძალიან რთული ეკონომიკური გამოწვევების და იმ მოვლენების ფონზე, რაც ჩვენს ქვეყანასში და რეგიონში ვითარდება, ჩემთვის ძალიან გასაკვირია რომ რიგ დეპუტატებს სურვილი არ აქვთ, რომ ეროვნული ბანკის ანგარიში მოისმინონ. მით უფრო, რომ ჩვენი ყველა პროგნოზი პრაქტიკულად გამართლდა. უამრავი პოსტსაბჭოთა ქვეყნის ცენტრალური ბანკებიდან ჩამოდიან საქართველოს გამოცდილების გასაზიარებლად და ამ დროს ალბათ ეს უნდა იყოს მთავარი ტრიბუნა, სადაც ყველა მნიშვნელოვან ეკონომიკურ საკითხს განვიხილავთ.

მე პარლამენტის თავმჯდომარესთან კომუნიკაცია მაქვს და იმედს გამოვთქვავ, რომ თებერვლის პირველივე კვირაში ეროვნული ბანკის ანგარიშის მოსმენა მოხერხდება“, - განაცხადა ქადაგიძემ.