ინდონეზიის დედაქალაქში გუშინ განხორციელებულ ტერაქტებზე პასუხისმგებლობა „დაეშმა“ („ისლამური სახელმწიფო“) აიღო.

„ბიბისის“ ცნობით, განცხადების თანახმად, რომელიც სოციალურ ქსელში გავრცელდა ნათქვამია, რომ ისინი „ჯვაროსანთა კოალიციის“ წევრებს დაესხნენ თავს - ასე უწოდებენ იმ ქვეყნების ჯგუფებს, რომლებიც ერაყსა და სირიაში ბოევიკების წინააღმდეგ იბრძვიან და რომელსაც აშშ მეთაურობს.

განცხადებაში ნათქვამია, რომ ოთხი ტერორისტი ე.წ. „შაჰიდის ქამრითა“ და იარაღებით იყო აღჭურვილი. გარდა ამისა, თავდასხმების დროს წინასწარ დამონტაჟებული ასაფეთქებელი მოწყობილობებიც აამოქმედეს.

ამავდროულად , ვრცელდება ინფორმაცია, რომ პოლიციამ ტერაქტებთან კავშირში ეჭვმიტანილი 3 პირი დააკავა,

ჯაკარტას ცენტრალურ ქუჩაზე მდებარე პოლიციის შენობასთან ექვსი აფეთქება 14 იანვარს, დილით მოხდა, რასაც 12 ადამიანი ემსხვერპლა, მათგან 5 პოლიციელია. არიან დაშავებულებიც. როგორც "სიენენი" ჯაკარტას პოლიციაზე დაყრდნობით იტყობინება, აფეთქება სავაჭრო ცენტრთანაც მოხდა, რასაც სროლის ხმა მოჰყვა. ერთ-ერთი აფეთქება კი გაერო-ს შენობასთან ახლოს მდებარე "სტარბაქსის" კაფესთან განხორციელდა, რა დროსაც ჰოლანდიის მოქალაქე, გაეროს თანამშრომელი დაშავდა, თავდასხმებში დაახლოებით 7 მებრძოლი მონაწილეობდა. 4-მა მათგანმა თავი აიფეთქა, ერთ-ერთის ლიკვიდაცია პოლიციამ მოახერხა.