სამინისტრო ამ დროისთვის არსებული ზარალის შესახებ ინფორმაციას დეტალურ ინფორმაციას ავრცელებს - აჭარაში, კერძოდ, ბათუმში შტორმის შედეგად, ახალი ბულვარის ტერიტორიაზე წყალი ბილიკამდე ამოვიდა, დაზიანდა საცხოვრებელი სახლის სახურავები.

მთლიანობაში, აჭარის ტერიტორიაზე დაზიანებულია 150-ზე მეტი სახლის სახურავი, მათ შორის, 100-ზე მეტი ხელვაჩაურში, 4 ქობულეთში, საცხოვრებელი სახლის სახურავები დაზიანებულია ბათუმშიც. ქობულეთში ჩამოინგრა 40 მეტრიანი ნაპირდამცავი ნაგებობა, დაზიანებულია, ასევე, გარეგანათების ბოძები.

გურია - ოზურგეთში დაზიანებულია 90 ინდივიდუალური სახლის, 4 სკოლისა და 1 ადმინისტრაციული შენობის სახურავი.

ურეკში, კერძოდ, მაგნიტიტის დასახლებაში, პრობლემები შეექმნა ნაპირდაცვით ნაგებობებს.

შიდა ქართლი - გორში ქარმა 20-ზე მეტ მრავალსართულიან სახლს გადახადა სახურავი, დაზიანებულია ავტომანქანები.

თბილისი - დაზიანებულია 60-ზე მეტი სახლის სახურავი.

ეს სამინისტროს მიერ მუნიციპალიტეტებიდან ამ დროისთვის მიღებული ინფორმაცია, რომელიც სისტემატურად მოწმდება.

საქართველოს მთავრობამ შექმნა საგანგებო შტაბი, რომელიც 24 საათიან რეჟიმში იმუშავებს. გარდა ამისა, საქართველოს რეგიონული განვითარებისა და ინფრასტრუქტურის სამინისტროში მოქალაქეებს შეუძლიათ დარეკონ ცხელ ხაზზე - 2 510 774.