ნავთობის ფასის ვარდნის გამო უმსხვილესი ბრიტანული ნავთობკომპანია BP 4 000 დასაქმებულის დათხოვნას გეგმავს. ამის შემდეგ გამოცემა "ბლუმბერგი" იტყობინება.

შეგახსენებთ, ნავთობის ფასმა ვარდნა გასული წლის სექტემბერში დაიწყო. 13 იანვრის მდგომარეობით კი ერთი ბარელი ნედლი ნავთობის ღირებულება $31-ს ჩამოსცდა, ერთი წლის წინ კი მისი ღირებულება $53-ს შეადგენდა.

რაც შეეხება BP-ის, კომპანიას პრობლემები 2010 წელს მექსიკის ყურეში ნავთობმომპოვებელ პლატფორმაზე მომხდარი ავარიის შემდეგ შეექმნა. მაშინ კომპანიის 11 მუშა დაიღუპა, გარემოს კი რამდენიმე ათეული მილიარდი დოლარის ღირებულების ზარალი მიადგა. ზარალის ასანაზღაურებლად BP-იმ $40 მილიარდის ღირებულების აქტივები გაყიდა.

BP-იმ ჩრდილოეთის ზღვაში ახალი ნავთობპლატფორმების მშენებლობის პროექტები დროებით შეაჩერა და იქ დასაქმებული 600 ადამიანიც გაათავისუფლა.