თურქეთში საქართველოდან კონტრაბანდულად გატანილი ვან დეიკის 14-მილიონიანი ნახატი აღმოაჩინეს

მსოფლიო - 16:26, 08 Jan, 2016

3196

სტამბოლში კონტრაბანდასთან ბრძოლის სამსახურმა საქართველოდან კონტრაბანდულად გატანილი ფლამანდრიელი მხატვარის ვან დეიკის 14 მილიონად შეფასებული ნახატი აღმოაჩინა, ამის შესახებ ინფორმაციას თურქული მედია ავრცელებს.როგორც გამოძიებამ დაადგინა ნახატის შეძენა საქართველოში 200 000 დოლარად მოხდა, შემდეგ ის სტამბოლში გადაიტანეს და ერთ-ერთ სასტუმროში მის 14 მილიონად გაყიდვას ცდილობდნენ. სპეცოპერაციის შედეგად კონტრაბანდისტები დააკავეს, ხოლო ნახატი ნივთმტკიცებად ამოიღეს.

ნამდვილობის დადგენის მიზნით ნახატი ტოპკაპის მუზეუმის ლაბორატორიაში იქნა გადაგზავნილი, სადაც დაადგინეს რომ ნახატი ნამდვილად ვან დეიკის შემოქმედებას ეკუთვნის.

ამ დროისთვის ხელოვნების ნიმუში თურქეთის სახელმწიფოს საკუთრებაშია.

უცნობია როგორ აღმოჩნდა საქართველოს ტერიტორიაზე ვან დეიკის ნახატი, რომელიც საქართველოში დაცული არასდროს ყოფილა და არ ირიცხება არცერთ მუზეუმსა თუ რეგისტრირებულ კერძო კოლექციებში.
არსებობს ვერსია, რომ საქართველო კონტრაბანდული გზის ერთ-ერთი შემადგენელი ნაწილი იყო და ნამუშევარი რუსეთიდან, საქართველოსა და თურქეთის გავლით, ევროპაში გაჰქონდათ.