ქართველი დიპლომატები პარკინგის ჯარიმების გადაუხდელობით ლიდერობენ

ქართველი დიპლომატები პარკინგის ჯარიმების გადაუხდელობით ლიდერობენ - ნორვეგიული მედია

მსოფლიო - 11:47, 08 Jan, 2016

1716

ნორვეგიაში აკრედიტებულ დიპლომატიურ წარმომადგენლებს შორის პარკინგის ჯარიმების გადაუხდელობით ქართველი დიპლომატები ლიდერობენ. ამის შესახებ ინფორმაციას ნორვეგიული Osloby ავრცელებს.

"სამშაბათს, ოსლოში მდებარე უცხო ქვეყნების საელჩოებს პარკინგის ჯარიმის სახით 307 500 კრონის ოდენობის დავალიანება დაუგროვდათ. სიის სათავეში პატარა რესპუბლიკა მოექცა" - წერს გამოცემა.
სააგენტოს თანახმად, საქართველოს საელჩოს ნორვეგიაში პარკინგის ჯარიმის გადაუხდელობის გამო 101 850 კრონის ოდენობის დავალიანება დაუგროვდა, რაც დაახლოებით 27 500 ლარს შეადგენს.

როგორც Osloby წერს, ისინი საქართველოს საელჩოს დაუკავშირდნენ, სადაც ქალბატონმა უპასუხა, რომ მარტო იყო, ამ თემასთან დაკავშირებით კომენტარს ვერ გააკეთებდა, თანაც საერთოდ არ მართავდა ავტომობილს.

„ამის შემდეგ საელჩოს ელექტრონული ფოსტით მივმართეთ და მივიღეთ პასუხი, რომ აღნიშნულთან დაკავშირებით საელჩო ინფორმირებულია და საკითხზე მუშაობენ" - წერს სტატიის ავტორი.

გამოცემის თანახმად, ვინაიდან უცხოურ საელჩოებს დიპლომატიური იმუნიტეტი იცავს, ადგილობრივი მთავრობას პარკირების პრობლემის მოგავრება უჭირს.
რაც შეეხება სხვა ქვეყნებს, პორტალის ინფორმაციით, მეორე ადგილს მაროკოს საელჩო (30 150 კრონი), მესამეს - ვიეტნამის (25 600 კრონი), ხოლო მეოთხეს - ერაყის საელჩო (22 800 კრონი) იკავებს.