კომპანია "კოკა-კოლამ" რუსეთის რუკაზე ყირიმის მონიშვნისთვის, უკრაინას ბოდიში ოფიციალურად მოუხადა. ამის შესახებ ვაშინგტონში უკრაინის საელჩო იტყობინება. დიპლომატიური მისიის მიერ გავრცელებულ განცხადებაში ნათქვამია, რომ „კოკა-კოლას“ წარმომადგენელი, ოთხშაბათს უკრაინის საელჩოს ეწვია , რათა ბოდიშის წერილი თავად მიეტანა.

"კოკა-კოლამ" ბოდიში მას შემდეგ მოიხადა, რაც რამდენიმე დღის წინ საშობაო კამპანიის ფარგლებში, სოციალურ ქსელ "ვკონტაქტე"-ში, კომპანიამ საკუთარ ოფიციალურ გვერდზე რუკა გამოაქვეყნა, სადაც ყირიმის ნახევარკუნძული რუსეთის შემადგენლობაშია.

"კოკა-კოლას" ცენტრალურ ოფისის აგანმარტებით, რუკაზე ყირიმის მონიშვნა "კოკა-კოლას" რუსეთის წარმომადგენლობის ინიციატივა იყო.

„კოკა-კოლას“ რუსეთის წარმომადგენლობამ გამოიყენა სტილიზებული რუსეთის რუკა, როგორც საშობაო კამპანია, თუმცა მასში ცვლილებები ჩვენთან შეთანხმების გარეშე განხორციელდა“ - აცხადებს კომპანია.

უმაღლესი რადას დეპუტატმა მუსტაფა ნაიემმა "ფეისბუქის" საკუთარ გვერდზე მთავრობას "კოკა-კოლას" პროდუქციისთვის ბოიკეტის გამოცხადებისკენ მოუწოდა.

ამის შემდეგ კომპანიამ აღნიშნული რუკა წაშალა. ახალ წლამდე ერთი დღით ადრე კი , "ვკონტაქტე"-ში რუსეთის რუკა ყირიმის ნახევარკუნძულის, კურილიის კუნძულებისა და კალინინგრადის რეგიონის გარეშე გამოაქვეყნა.