აშშ-ის პრეზიდენტის ემოციური სიტყვა თეთრ სახლში - ბარაკ ობამამ იარაღის გაყიდვის კონტროლის გამკაცრებასთან დაკავშირებით, ახალი ზომების შემოღების შესახებ ისაუბრა, რა დროსაც ატირდა.

ობამამ აღნიშნული გადაწყვეტილება კონგრესის გვერდის ავლით მიიღო.

სიტყვით გამოსვლისას, ნიუთაუნის სკოლაში მომხდარი მასობრივი ხოცვის გახსენებისას , აშშ-ის პრეზიდენტმა ცრემლების შეკავება ვერ შეძლო და ატირდა.

„ყოველთვის იმ ბავშვებზე ვფიქრობ და ეს მაგიჟებს“ - განაცხადა აცრემლებულმა ობამამ.

აშშ-ს პრეზიდენტმა სიტყვით გამოსვლისას, სამი წლის წინ 20 მოკლული ბავშვიდან ერთ-ერთის მამაც წარადგინა.

2012 წელს სკოლაზე თავდასხმის შედეგად 26 ადამიანი, მათ შორის 20 ბავშვი დაიღუპა. იარაღის გაყიდვის გამკაცრების ინიციატივით ობამა შემთხვევის შემდეგაც გამოვიდა, თუმცა კონგრესმა მას მხარი არ დაუჭირა.

ბარაკ ობამას გეგმის თანახმად, იარაღის მაღაზიებს შესაბამისი ლიცენცია უნდა ჰქონდეთ. გარდა ამისა, მოუწევთ საკუთარი კლიენტების ბიოგრაფიის გადამოწმებაც. ობამას გეგმის თანახმად, გამოძიების ფედერალურ ბიუროს 200-კაციანი შტატიც დაემატება, რომელიც დილერების საქმიანობას კონტროლს გაუწევს.

ბარაკ ობამა იარაღის შეძენაზე კონტროლის გამკაცრების ინიციატივით არაერთხელ გამოვიდა, თუმცა კონგრესი საკანონმდებლო ცვლილებებს კატეგორიულად ეწინააღმდეგება.