2015 წლის ნოემბერში მშპ-ს რეალურმა ზრდამ 5.3 პროცენტი შეადგინა

2015 წლის ნოემბერში მშპ-ს რეალურმა ზრდამ 5.3 პროცენტი შეადგინა - ქუმსიშვილი

ბიზნესი & ეკონომიკა - 14:30, 30 Dec, 2015

919

,,2015 წლის ნოემბერში წინა წლის შესაბამის პერიოდთან შედარებით, მთლიანი შიდა პროდუქტის რეალური ზრდის ტემპმა 5.3% შეადგინა“ - ამის შესახებ ეკონომიკისა და მდგრადი განვითარების მინისტრმა დიმიტრი ქუმსიშვილმა განაცხადა.

უწყების ინფორმაციით, 2015 წლის პირველ კვარტალში მთლიანი შიდა პროდუქტის 3.3%-იანი საშუალო რეალური ზრდა დაფიქსირდა, მეორე კვარტალში ზრდამ 2.5% შეადგინა წინა წლის შესაბამის პერიოდთან მიმართებაში, ხოლო მესამე კვარტალში საშუალო რეალურმა ზრდამ 2.5% შეადგინა.

2015 წლის 11 თვის (იანვარი-ნოემბერი) საშუალო რეალურმა ზრდამ 3.0% შეადგინა.

მიმდინარე წლის ნოემბერში, მშპ-ს მნიშვნელოვანი რეალური ზრდა დაფიქსირდა შემდეგ სფეროებში: მშენებლობა - 30%; მეტალურგიული პროდუქტების წარმოება - 30%; სამთომოპოვებითი მრეწველობა -15%; სასტუმროები და რესტორნები - 10%; საფინანსო შუამავლობა - 9%.

ეკონომიკისა და მდგრადი განვითარების მინისტრის დიმიტრი ქუმსიშვილის განცხადებით, "ჩვენ ძალიან კარგი მონაცემები გვაქვს. დღეს დილით სტატისტიკის ეროვნულმა სააგენტომ გამოაქვეყნა მთლიანი შიდა პროდუქტის წინასწარი ზრდა - ეს არის 5,3 %, რაც ძალიან კარგი მაჩვენებელია ნოემბრისთვის. წლიური გადაანგარიშებით ეს ნიშნავს იმას, რომ ჩვენ წელს უკვე მთლიანი შიდა პროდუქტის 3%-იან ზრდაზე გავალთ".

ეკონომიკის სამინისტროს ინფორმაციით, მიუხედავად რეგიონში მიმდინარე რთული ეკონომიკური მდგომარეობისა, ქვეყნის ეკონომიკა საპროგნოზო მაჩვენებელზე მაღალი ტემპით იზრდება. 2015 წლის 11 თვის მონაცემებით საქართველოს რეალური ეკონომიკური ზრდა აღემატება საერთაშორისო საფინანსო ინსტიტუტების მიერ გაკეთებულ პროგნოზს.