საქართველოს ენერგეტიკისა და წყალმომარაგების მარეგულირებელი ეროვნული კომისია „ენერგო პრო-ჯორჯიას“ აბონენტებისთვის ტარიფის დადგენაზე მსჯელობს.

მიუხედავად იმისა, რომ რეგიონის მოსახლეობისთვის ტარიფი 2017 წლამდე უკვე განსაზღვრულია, სემეკში ამბობენ, რომ არსებობს მექანიზმი, რომლის მეშვეობით ტარიფის ყოველწლიური გადახედვაა შესაძლებელი. მათივე ინფორმაციით, ტარიფის ზრდა სავარაუდოდ, მოსალოდნელი არ არის.

„ეს არის ის დღე, როდესაც უნდა მოხდეს კორექტირების განხილვა და კომისია მიიღებს შესაბამის გადაწყვეტილებას. რაც შეეხება ტარიფის ზრდას, მოსალოდნელი არ არის. თუმცა მოვლენებს წინ ნუ გავუსწრებთ. დეპარტამენტი საკუთარ გაანგარიშებას წარმოგვიდგენს, ასევე მოვისმენთ კომპანიის მოსაზრებებს და გადაწყვეტილება ამის შემდეგ იქნება მიღებული“, - განაცხადა სემეკის წევრმა გოჩა შონიამ.

კომპანიაში ტარიფის გაზრდასთან დაკავშირებით არაფერს ამბობენ, თუმცა აცხადებენ, რომ მათი სურვილია მაქსიმალურად გაუმჯობესდეს მომსახურების ხარისხი.

„გვაქმს მყარი არგუმენტი, რომ აუცილებელია უფრო მეტი მორიგე ბრიგადების დამატება, ტექნიკური მომსახურე პერსონალი, რათა ჩვენს აბონენტებს უფრო ხარისხიანად მოვემსახუროთ. ჩვენი სურვილია, რომ ხარისხი მაქსიმალურად ავწიოთ. ამისთვის რაც არის საჭირო, ეს უკვე სემეკის გადასაწყვეტია“, - განაცხადა „ენერგო პრო-ჯორჯიას“ დირექტორმა მიხეილ ბორცვაძემ.