რუსეთი თურქეთის წინააღმდეგ მორიგი სანქციების დაწესებას გეგმავს

მსოფლიო - 12:52, 28 Dec, 2015

1841

რუსეთის ვიცე-პრემიერის, არკადი დვორკოვიჩის განცხადებით, რუსეთი თურქეთის წინააღმდეგ ახალი ზომების მიღებას გეგმავს. ამის შესახებ დვორკოვიჩმა ტელეკომპანია "Россия 24"-თან საუბარში განაცხადა.
"მიგვაჩნია, რომ არამეგობრულ ქმედებებზე ადეკვატური პასუხი საჭიროა. ასეთი პასუხის გაცემა დაწყებულია. იქნება შემდგომი ნაბიჯებიც, რომლის შესახებ განცხადება გაკეთდება"- აღნიშნა დვორკოვიჩმა.

შეგახსენებთ, რუსეთ-თურქეთის ურთიერთობა 24 ნოემბრის შემდეგ დაიძაბა. თურქეთმა საჰაერო სივრცის დარღვევისთვის, რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. ოფიციალური მოსკოვი თურქეთის საზღვრის დარღვევას უარყოფს. პუტინის თქმით, ეს შემთხვევა იყო "ტერორისტების თანამზრახველების მიერ ზურგში განხორციელებული დარტყმაა". მისივე განცხადებით, აღნიშნული ქმედება რუსეთ-თურქეთის ურთიერთობაზე სერიოზულ გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა და უვიზო რეჟიმიც გააუქმა. ბოსტნეულის, ხილის, ნედლეულისა და მრეწველობის პროდუქცია რუსეთში 2016 წლის 1-ელი იანვრიდან ვეღარ შევა.

რაც შეეხება ერდოღანს, მისი თქმით, მსგავსი ქმედების განმეროების შემთხვევაში, თურქეთი ანალოგიურად მოიქცევა.