ინფორმაციას ამის შესახებ შიდა "ქართლის საინფორმაციო ცენტრი" ავრცელებს.

ცენტრის ინფორმაციით, 52 წლის თამაზ მაისურაძესა და 35 წლის მამუკა ხუციშვილს ბრალი ქურდობაში, სისხლის სამართლის კოდექსის 177 მუხლის მე-2 ნაწილის "ა" და "ბ" და მე-3 ნაწილის "ა" და "ბ" პუნქტების თანახმად ედებათ.

პროკურატურის მიერ გავრცელებული ინფორმაციის თანახმად, მაისურაძემ და ხუციშვილმა 2013 წლის 18 მარტს სოფელ ორთაშენში მცხოვრებ რამაზ ლობჟანიძის ხის გადამამუშავებელი საამქროდან ელექტოძრავი მოიპარეს, მოპარული ნივთი კი ქალაქ ხაშურში ჩააბარეს.

სამართალდამცავებმა მამაკაცების დაკავება შეძლეს და დასაკითხად სამართალდამცავ ორგანოში გადაიყვანეს.

სასამართლო პროცესზე თამაზ მაისურაძემ აღნიშნა: "როდესაც გორის სამმართველოში დასაკითხად გადმოგვიყვანეს, სამართალდამცავების მხრიდან ადგილი ჰქონდა ძალადობას, ფიზიკურ და სიტყვიერ ანგარიშსწორებას. პირი, რომელიც ჩვენს დაკითხვას აწარმოებდა, სამმართველოს უფროსის მოადგილეა. მისი თქმით, ჩვენს დანაშაულთან ერთად, სხვა ქურდობაც უნდა გვეღიარებინა. უარის თქმის შემდეგ კი ფიზიკურად გაგვისწორდა, გვაფურთხა და გვაგინა. ამას არ ვაპატიებ".

აუცილებელია აღინიშნოს, რომ თამაზ მაისურაძე ცხრაჯერ გახლავთ ნასამართლევი, დამნაშავეები ჩადენილ დანაშაულს აღიარებენ და მათ წინააღმდეგ მეათე სასამართლო პროცესი მიმდინარეობს.