რუსეთი თურქეთის მიერ მიწოდებული ჩამოგდებული თვითმფრინავის შავი ყუთის გაშიფვრას ვერ ახერხებს

მსოფლიო - 10:15, 22 Dec, 2015

2423

რუსი გამომძიებლების განცხადებით, ისინი, თურქეთის მიერ ჩამოგდებული რუსული სამხედრო თვითმფრინავის შავი ყუთიდან ინფორმაციის მიღებას ვერ ახერხებენ.

რუსული მხარის თქმით, მოწყობილობას, რომელსაც უნდა დაედასტურებინა, რომ თვითმფრინავს თურქეთის საჰაერო სივრცე არ დაურღვევია, შიგნიდან დაზიანებულია და 16 მიკრო ჩიპიდან 13-ზე ინფორმაციის გაშიფვრა შეუძლებელია.

მიუხედვად ამისა, რუსეთის შეიარაღებული ძალები საქმეში დამატებითი ექპერტების ჩართვას აპირებს.

შეგახსენებთ, რუსეთ-თურქეთის ურთიერთობა 24 ნოემბრის შემდეგ დაიძაბა. თურქეთმა საჰაერო სივრცის დარღვევისთვის, რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. ოფიციალური მოსკოვი თურქეთის საზღვრის დარღვევას უარყოფს. პუტინის თქმით, ეს შემთხვევა იყო "ტერორისტების თანამზრახველების მიერ ზურგში განხორციელებული დარტყმაა". მისივე განცხადებით, აღნიშნული ქმედება რუსეთ-თურქეთის ურთიერთობაზე სერიოზულ გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა და უვიზო რეჟიმიც გააუქმა. დღეს გავრცელებული ინფორმაციით კი, რუსეთის მთავრობამ იმ თურქული პროდუქციის ჩამონათვალი დაამტკიცა, რომლის რუსეთში იმპორტიც აიკრძალება. სიაში მოხვედრილი სოფლის მეურნეობის, ნედლეულისა და მრეწველობის პროდუქცია რუსეთში 2016 წლის 1-ელი იანვრიდან ვეღარ შევა. ამავდროულად, რუსეთმა თურქეთთან უვიზო რეჟიმი გააუქმა, რომელიც ძალაში 1-ლი იანვრიდან შევა.

რაც შეეხება ერდოღანს, მისი თქმით, მსგავსი ქმედების განმეროების შემთხვევაში, თურქეთი ანალოგიურად მოიქცევა.