იგორ კოკოშკოვი საქართველოს კალათბურთელთა ნაკრებს დაემშვიდობა

სპორტი - 10:26, 21 Dec, 2015

6386

საქართველოს კალათბურთელთა ნაკრებს 2016 წლიდან ახალი მწვრთნელი ეყოლება. იგორ კოკოშკოვი ჩვენს საქართველოს გუნდს აღარ გაწვრთნის, ევრობასკეტის დასრულების შემდეგ მას ორწლიანი კონტრაქტის ვადა ამოეწურა. იგორ კოკოშკოვის თავის შეგირდებს და საქართველოს საკალათბურთო საზოგადოებას ღია წერილით გამოემშვიდობა.

"ჩემო მეგობრებო საქართველოს საკალათბურთო სამყაროდან

მინდა გამოვხატო დიდი მადლიერება კალათბურთის ფედერაციაში მომუშავე ყველა იმ პიროვნებისადმი, რომლებმაც ბოლო რვა წლის განმავლობაში საქართველოს ნაკრებში მუშაობის საშუალება მომცა. მადლობა თითოეულ მოთამაშეს, სამწვრთნელო შტაბს, ნაკრებში დასაქმებულ ყველა ადამიანს უთვალავი საათის დაუღალავად შრომაში გატარებისთვის.

უზარმაზარი გამოცდილება იყო საქართველოს ნაკრებში მოღვაწეობა, ბევრი კარგი მოსაგონარი დამიტოვა მეხსიერებაში, რაც სამუდამოდ დაიკავებს განსაკუთრებილ ადგილს ჩემს გულში.

უამრავი გამოწვევა გვქონდა, უამრავი სიძნელე გადავლახეთ ერთად, რათა დასახული მიზნებისთვის მიგვეღწია. ამასთან, საქართველოს ნაკრები მუდმივად იზრდებოდა, როგორც გუნდი, რაც ჩემთვის ახლაც საამაყოა. მჯერა, რომ დღეს სწორედ საქართველოს ნაკრების წყალობით ყველა უკეთესები ვართ და კალათბურთიც გაცილებით ძლიერია.

გისურვებთ საუკეთესოს. საქართველოს ნაკრებს ყოველთვის ეყოლება საუკეთესო მეგობარი და №1 გულშემატკივარი ჩემი სახით.

დიდი მადლობა, ღმერთი გფარავდეთ.

იგორ კოკოშკოვი"

კოკოშკოვი საქართველოს კალათბურთელთა ნაკრებს სათავეში 2008 წლიდან ედგა. მისი ხელმძღვანელობით ქართველმა კალათბურთელებმა საერთაშორისო ასპარეზზე მრავალ წარმატებას მიაღწიეს.