სააკაშვილის დროს ხელისუფლებაში პროამერიკული-რუსოფობები იყვნენ, ახლა დაბალანსებულები არიან

სააკაშვილის დროს ხელისუფლებაში პროამერიკული-რუსოფობები იყვნენ, ახლა დაბალანსებულები არიან - პუშკოვი

მსოფლიო - 10:15, 18 Dec, 2015

2610

რუსეთის სახელმწიფო სათათბიროს საერთაშორისო კომიტეტის თავმჯდომარის ალექსეი პუშკოვის განცხდებით, იმ შემთხვევაში, თუ ქართველი დეპუტატები საერთაშორისო არენაზე ანტირუსულ განცხადებებზე უარს იტყვიან, ეს რუსეთ-საქართველოს ურთიერთობის ნორმალიზებას ხელს შეუწყობს.

"ვისურვებდი, რომ ქართულმა საპარლამენტო დელეგაციებმა საერთაშორისო არენაზე რუსოფობიაზე უარი თქვან . სამწუხაროდ, სააკაშვილის პარტიის მხრიდან, რომელიც კვლავ განაგრძობს არსებობას, ვხედავთ ისტერიკულ გამოხტომებსა და ბრალდებებს" - განუცხადა პუშკოვმა ჟურნალისტებს.

მისი თქმით, ქართველმა დეპუტატებმა, თავი უნდა შეიკავონ ემოციებისგან და არა მხოლოდ საკუთარ, არამედ ხალხის ინტერესებზეც იფიქრონ. მისი თქმით, რუსეთსა და საქართველოს შორის ურთიერთობა გაწონასწორებული მას შემდეგ გახდა, რაც საქართველოში არჩევნები ჩატარდა და სააკაშვილმა ქვეყანა დატოვა.

"ბოლო წლის განმავლობაში საქართველოსა და რუსეთს შორის არ არსებობს აშკარა დაძაბულობა. ვფიქრობ, რომ საქართველოსთვის ეს იქნება ასევე, დამატებითი ფინანსური მხარდაჭერა, რადგან ქვეყანა მდიდარი არ არის და მძიმე მდგომარეობაში იმყოფება. ამჟამინდელმა ხელისუფლებამ, პრინციპში, დაადასტურა, რომ საქართველოს საგარეო პოლიტიკის განმსაზღვრელ ხაზს არ წარმოადგენს რუსეთისადმი მტრობა, როგორც ეს იყო წინა ხელისუფლების დროს. სააკაშვილის დროს ხელისუფლებაში იყვნენ პროამერიკული-რუსოფობი ადამიანები. ახლა უფრო დაბალანსებულები არიან. ხვდებიან, რომ საქართველოს გააჩნია ინტერესები, რომლებიც მათ რუსეთთან აკავშირებს. რომ პროგრესი არის, ურთიერთობები თანდათანობით უმჯობესდება. ეს პუტინმაც აღნიშნა. არ გვსურს, რომ საქართველოში შეიქმნას ანტირუსული ისტერიის რეციდივები. ჩვენ მზად ვართ ურთიერთობების დალაგებისთვის" - განაცხადა პუშკოვმა.

შეგახსენებთ, გუშინ, რუსეთის პრეზიდენტმა ვლადიმერ პუტინმა ყოველწლიურ პრესკონფერენციაზე საქართველო-რუსეთის ურთიერთობებზე საუბრისას განაცხადა, რომ მზად არის საქართველოსთან სავიზო რეჟიმი გააუქმოს.