რუსეთის პრეზიდენტის ვლადიმერ პუტინის ყოველწლიურ პრესკონეფრენციაზე გაჟღერებულ განცხადებებს, საქართველოს მესამე პრეზიდენტი და ამჟამად ოდესის ოლქის გუბერნატორი, მიხეილ სააკაშვილი ფეისბუკის გვერდზე გამოეხმაურა.

„როგორც ყოველთვის, პუტინმა მე გამიხსენა. ვლადიმერ ვლადიმეროვიჩს ჩემი დავიწყება არ შეუძლია. მას ძალიან არ მოსწონს ჩემი საქმიანობა უკრაინაში და მე მისი მესმის. თუ უკრაინაში კორუფციას ხერხემალში გადავტეხავთ და ნამდვილად გავატარებთ სიღრმისეულ რეფორმებს, მისი სიცრუის იმპერია ბანქოს სახლივით დაიშლება. პუტინმა კიდევ ერთხელ იცრუა, როდესაც განაცხადა, რომ ამერიკელებმა ვიზა არ მომცეს, მაშინ როცა სამწლიანი სამუშაო ვიზა მაქვს.
ჩემთან დაკავშირებით იმდენი ტყუილი ილაპარაკა, მალე პლასტიკური ოპერაცია დასჭირდება, რომ ცხვირი არ გაეზარდოს" - წერს სააკაშვილი.

შეგახსენებთ, პუტინმა დღეს გამართულ ყოველწლიურ პრესკონფერენციაზე განაცხადა, რომ უკრაინაში საქართველოს ყოფილი მთავრობის წევრების საქმიანობა უკრაინელი ხალხისთვის სახეში შეფურთხებაა, რადგან ამ გუნდმა უკრაინა საგარეო მართვის ქვეშ მოაქცია. მისი თქმით, , აშშ-ში სააკაშვილს სამუშაო ვიზა არ მისცეს და უკრაინაში გააგზავნეს.