რუსეთი სუ-24-ის ჩამოგდებისთვის თურქეთისგან კომპენსაციას მოითხოვს

მსოფლიო - 15:16, 16 Dec, 2015

1542

რუსეთის საგარეო საქმეთა მინისტრის, ალექსეი მეშკოვის განცხადებით, თურქეთმა ჩამოგდებული სუ-24-ის სანაცვლოდ კომპენსაცია უნდა გადაიხადოს.

ამის შესახებ გამოცემა „რია ნოვოსტი“ იტყობინება.

„თურქეთის ხელისუფლებას, მომხდართან დაკავშირებით პასუხისმგებლობის თავიდან აცილებისა და სირიაში რუსეთის კანონიერი ქმედებების ცილისწამების ნაცვლად, ბოდიში უნდა მოიხადა, ზარალი აენაზღაურებინა და მომავალში მსგავსი ქმედების გაუმეორებლობის გარანტია უნდა მოეცა“ - განაცხადა მეშკოვმა.

მისი თქმით, „რუსულ თვითმფრინავსა და მის ეკიპაჟზე თავდასხმა- სერიოზული დანაშაულია, რომელსაც შეუძლებელი, შესაბამისი შედეგები არ მოჰყვეს.“ მეშკოვის თქმით, ფაქტები იმაზე მეტყველებს, რომ ეს იყო უფრო ადრე სანქცირებული ანტირუსული აქცია.

შეგახსენებთ, რუსეთ-თურქეთის ურთიერთობა 24 ნოემბრის შემდეგ დაიძაბა. თურქეთმა საჰაერო სივრცის დარღვევისთვის, რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. ოფიციალური მოსკოვი თურქეთის საზღვრის დარღვევას უარყოფს. პუტინის თქმით, ეს შემთხვევა იყო "ტერორისტების თანამზრახველების მიერ ზურგში განხორციელებული დარტყმაა". მისივე განცხადებით, აღნიშნული ქმედება რუსეთ-თურქეთის ურთიერთობაზე სერიოზულ გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა და უვიზო რეჟიმიც გააუქმა. დღეს გავრცელებული ინფორმაციით კი, რუსეთის მთავრობამ იმ თურქული პროდუქციის ჩამონათვალი დაამტკიცა, რომლის რუსეთში იმპორტიც აიკრძალება. სიაში მოხვედრილი სოფლის მეურნეობის, ნედლეულისა და მრეწველობის პროდუქცია რუსეთში 2016 წლის 1-ელი იანვრიდან ვეღარ შევა. ამავდროულად, რუსეთმა თურქეთთან უვიზო რეჟიმი გააუქმა, რომელიც ძალაში 1-ლი იანვრიდან შევა.

რაც შეეხება ერდოღანს, მისი თქმით, მსგავსი ქმედების განმეროების შემთხვევაში, თურქეთი ანალოგიურად მოიქცევა.