პოროშენკომ ავაკოვ-სააკაშვილს შორის მომხდარ კონფლიქტს "სამარცხვინო შემთხვევა" უწოდა

მსოფლიო - 12:34, 16 Dec, 2015

6838

უკრაინის პრეზიდენტმა, პეტრო პოროშენკომ შინაგან საქმეთა მინისტრ არსენი ავაკოვსა და ოდესის ოლქის გუბერნატოს მიხეილ სააკაშვილს შორის მოხმდარ კონფლიქტს „სამარცხვინო შემთხვევა“ უწოდა.

ამის შესახებ უკრაინის პრეზიდენტის ვებ-გვერდზე გამოქვეყნებულ განცხადებაშია საუბარი.

„მე, როგორც პრეზიდენტს, კონსტიტუციის, მოქალაქეების უფლებათა და თავისუფლებების გარანტს, არ შემიძლია იმ სამარცხვინო შემთხვევის იგნორირება, რომელიც ორშაბათს რეფორმების ეროვნულ საბჭოზე მოხდა.
დისკუსია ხშირად არის ხოლმე ცხარე, რადგან წარმოიშობა სხვადასხვა მოსაზრებები, კომპრომისები, იბადება რეფორმები.

ეროვნულ საბჭოზე დაუშვებელია უხეში ლანძღვა და შეურაცხყოფა, განსაკუთრებით ისეთი, რომელსაც რასისტული ქვეტექსტი აქვს, რომელიც ადამიანის ეროვნულ ღირსებას ეხება, მის უკრაინულ პატრიოტიზმს ეჭვქვეშ აყენებს და ვიღაცას მოუწოდებს "გაეთრიოს უკრაინიდან" - ნათქვამია განცხადებაში.

შეგახსენებმ, პრეზიდენტ პოროშენკოს ადმინისტრაციაში რეფორმების ეროვნულ საბჭოზე შეკრებილ მაღალჩინოსნებს შორის დაპირისპირება მოხდა. ერთმანეთს ოდესის გუბერნატორი მიხეილ სააკაშვილი, პრემიერ-მინისტრი არსენი იაცენუკი და შს მინისტრი არსენი ავაკოვი დაუპირისპირდნენ. როგორც უკრაინის შს მინისტრი ფეისბუკზე წერს, მან დაპირისპირებისას მიხეილ სააკაშვილს სახეში წყალი შეასხა.