თბილისის ჩართულობა ალიანსში ძირს უთხრის კავკასიის რეგიონის სტაბილურობას

თბილისის ჩართულობა ალიანსში ძირს უთხრის კავკასიის რეგიონის სტაბილურობას - რუსეთის საგარეო უწყება

მსოფლიო - 10:44, 10 Dec, 2015

1739

ჟენევის მოლაპარაკებებს მორიგი რაუნდის დასრულების შემდეგ, რუსეთის საგარეო უწყება შემაჯამებელ განცხადებას აქვეყნებს.

„8-9 დეკემბერს ჟენევაში საერთაშორისო დისკუსიების მორიგი რაუნდი გაიმართა, რომელსაც აფხაზეთის რესპუბლიკის, საქართველოს, რუსეთის ფედერაციის, აშშ-ის, სამხრეთ ოსეთის, გაეროს, ეუთოსა და ევროკავშირის თანათავმჯდომარეები ესწრებოდნენ“ - ნათქვამია განცხადებაში.

სამინისტრო აღნიშნავს, რომ საქართველო ისევ უარზეა, ძალის გამოუყენებლობის შესახებ იურიდიული დოკუმენტი გააფორმოს.

„აფხაზეთისა და სამხრეთ ოსეთის დელეგაციებმა მზადყოფნა დაადასტურეს, რომ მომზადდეს ასეთი დოკუმენტები, თუმცა ქართულმა მხარემ, კვლავ დაბლოკა ამ მნიშვნელოვანი საკითხის წამოწევა"– აღნიშნულია განცხადებაში.

შეხვედრაზე დაფიქსირდა რუსეთის შეშფოთება საქართველოსა და ნატოს შორის თანამშრომლობის გაღრმავებასთან დაკავშრებითაც.

"თბილისის დაჩქარებული ჩართულობა ალიანსში, ძირს უთხრის მრავალმხრივ მცდელობებს კავკასიის რეგიონში გრძელვადიანი სტაბილურობის დამყარებისთვის, მათ შორის ჟენევის დისკუსიის ეფექტურობასაც" – აღნიშნავს რუსეთის საგარეო უწყება.

განცხადების თანახმად, ჰუმანიტარულ საკითხებზე საუბრისას, მხარეებმა განიხილეს უგზო-უკვლოდ დაკარგულ პირთა, ჯარმრთელობის საკითხები. ასევე საფუძვლიანად იქნა განხილული გალის რაიონის სკოლების საკითხი.

„შეხვედრის ბოლოს ქართული მხარის მცდელობა დაიბლოკა, ესაუბრათ იძულებით გადაადგილებულ პირთა საკითხზეც. შეხვედრის თანათავმჯდომარეებმა კონსულტაციები ვადაზე ადრე დაასრულეს" - ნათქვამია განცხადებაში.