კოლუმბიის ნაპირებთან, ქალაქ კარტახენის სიახლოვეს, დაახლოებით 300 წლის წინ ჩაძირული, განძით დატვირთული ესპანური ხომალდი „სან-ხოსე“ აღმოაჩინეს. ამის შესახებ კოლუმბიის პრეზიდენტმა ხუან მანუელ სანტოსმა ტვიტერზე დაწერა.

ჩაძირული ხომალდი ზურმუხტებითა და ოქროსა და ვერცხლის მონეტებითაა დატვირთული. განძის სავარაუდო ღირებულება 1 მილიარდი აშშ დოლარია.

„დიდებული ამბავი! ხომალდი „სან-ხოსე“ ვიპოვეთ“. უფრო მეტ დეტალს მის შესახებ ხვალ, პრესკონფერენციაზე შეიტყობთ“, - დაწერა სანტოსმა ტვიტერზე.

ჩაძირულ ხომალდზე პრეტენზიას აცხადებს ამერიკული სამძებრო კომპანია Sea Search Armada, რომელსაც ოფიციალურ ბოგოტასთან ამ საკითხზე ხანგრძლივი სამართლებრივი დავა ჰქონდა. აღსანიშნავია, რომ ამ ადგილას ჩაძირული ხომალდის არსებობის შესახებ Sea Search Armada ჯერ კიდევ 1981 წელს იტყობინებოდა.

საწის ეტაპზე, კოლუმბიის ხელისუფლებამ და Sea Search Armada-მ შეთანხმებას მიაღწიეს, რომლის თანახმადაც, ამოღებულ განძს გაიყოფდნენ. თუმცა შემდეგ, ხელისუფლებამ აზრი შეიცვალა და დაჟინებით მოითხოვა, რომ მთლიანი განძი კოლუმბიას ეკუთვნოდა.

2011 წელს, აშშ-ის სასამართლომ ჩაძირული ხომალდი კოლუმბიის სახელმწიფოს კუთვნილებად გამოაცხადა.