კალიფორნიაში მომხდარ თავდასხმას ტერაქტის კვალიფიკაცია მიენიჭა

მსოფლიო - 10:00, 05 Dec, 2015

1159

აშშ-ს გამოძიებათა ფედერალურმა ბიურომ კალიფორნიის შტატის ქალაქ სან-ბერნარდინოში მომხდარ თავდასხმას ტერაქტის კვალიფიკაცია მიანიჭა. უწყების წარმომადგენელის, დეივიდ ბოუდიჩის განცხადებით, არსებობს მტკიცებულებები, რომ ბოროტმოქმედები თავდასხმისთვის წინასწარ ემზადებოდნენ. უწყების დირექტორის ჯეიმს კონის განცხადებით კი, დამნაშავეები სავარაუდოდ, საერთაშორისო ტერორისტული ქსელის წევრები იყვნენ.
გამოცემა The New York Times-ის ცნობით, ერთ-ერთ თავდამსხმელს, პაკისტანური წარმოშობის აშშ-ის მოქალაქეს, 28 წლის საიედ ფარუქს რადიკალ ისლამისტებთან ჰქონდა კავშირი, მისმა მეუღლემ, პაკისტანის მოქალაქემ ტაშფინ მალიქმა კი "ისლამური სახელმწიფოს" ერთგულების ფიცი დადო. AP-ის ცნობით კი, თავდასხმამდე რამდენიმე წუთით ადრე, მალიქმა სოციალურ ქსელში "ისლამური სახელმწიფოს" ლიდერი მოიხსენია.
შეგახსენებთ, კალიფორნიაში, ქალაქ სან ბერნარდინოში ცენტრალურ პარკთან ახლოს ორგანიზაცია Inland Regional Center-ში მომხდარ თავდასხმას 14 ადამიანი ემსხვერპლა, დაშავებულია 17 ადამიანი.

გავრცელებული ცნობით, ცოლ-ქმარი შენობაში შეიჭრა და ცეცხლსასროლი იარაღით უმისამართო სროლა განახორციელა. თავდასხმის შესახებ ოფისის თანამშრომლებმა თვითერის გვერდზე დაწერეს. ორივე თავდამსხმელი პოლიციის მიერ იქნა ლიკვიდირებული

Inland Regional Center-ი არის არასამთავრობო ორგანიზაცია, რომელიც შეზღუდული შესაძლებლობის მქონე პირებთან მუშაობს. ორგანიზაციაში 670-მდე ადამიანია დასაქმებული, რომელიც დაახლოებით 30 000-ზე მეტ შშმ პირს ემსახურება.