რუსეთი საბჭოთა პროპაგანდისტულ მეთოდს დაუბრუნდა

რუსეთი საბჭოთა პროპაგანდისტულ მეთოდს დაუბრუნდა - თურქეთის პრემიერი

მსოფლიო - 17:49, 03 Dec, 2015

1671

თურქეთის პრემიერ-მინისტრმა, აჰმედ დავუთოღლუმ კიდევ ერთხელ უარყო რუსეთის ხელისუფლების ბრალდება იმის შესახებ, რომ თურქეთი „ისლამურ სახელმწიფოსთან“ ნავთობით ვაჭრობს და აღნიშნული განცხადება საბჭოთა კავშრისდროინდელ ცრუ პროპაგანდისტულ მანქანას შეადარა.

„რუსულ პრესაში გავრცელებული და რუსეთის ოფიციალური პირების მიერ გაჟღერებული განცხადებები, მე პირადად ბავშვობას მაგონებს. ცივი ომის დროს არსებობდა საბჭოთა პროპაგანდა. ყოველ დღე ისინი ახალ ტყუილს იგონებდნენ, რომლისაც თავად სჯეროდათ და ფიქრობდნენ, რომ მთელს მსოფლიოს აჯერებდნენ“ - განაცხადა დავუთოღლუმ.

თურქეთის პრემიერის განცხადებით, რუსეთის ხელისუფლება ამ მეთოდებს კვლავ დაუბრუნდა.

შეგახსენებთ, რუსეთმა თურქეთის ხელისუფლება ჯიჰადისტებთან ვაჭრობაში რამდენჯერმე დაადანაშაულა. რუსეთის თავდაცვის სამინისტროს მტკიცებით, მათ ამის დამადასტურებელი ფაქტებიც გააჩნიათ, რომლებიც დღეს წარადგინა. უწყებან კადრები გავრცელა, სადაც სირია-თურქეთის საზღვარზე ავტომობილებისა და ტექნიკის კოლონის გადაადგილებაა ასახული, რაც მათი თქმით, თურქეთის მიერ ისლამური სახელმწიფოსგან ნავთობის შესყიდვის ფაქტს ადასტურებს.

მოსკოვის მტკიცებით, ამ ვაჭრობის შედეგად მოგებას პირადად ერდოღანის ოჯახი იღებს. ბრალდებას თურქეთის პრეზიდენტი კატეგორიულად უარყოფს.

თავის მხრივ, რუსეთის ბრალდებების საპასუხოდ, თურქეთის პრეზიდენტი, რეჯეპ ტაიპ ერდოღანი რუსეთს „ისლამურ სახელმწიფოსთან“ ნავთობ-გარიგებაში ადანაშაულებს და მტკიცებულებების გამოქვეყნების პირობას დებს. ერდოღანმა განაცხადა, რომ ის მზად არის თანამდებობიდან გადადგეს, თუკი ვლადიმერ პუტინის ბრალდებებები თურქეთის მიერ „ისლამური სახელმწიფოსგან“ ნავთობის შეძენის შესახებ დადასტურდა, „წინააღმდეგ შემთხვევაში კი სწორი საქციელი იქნებოდა, ამ ცრუ ბრალდების ავტორებს დაეტოვებინათ თანამდებობა“ - განაცხადა ერდოღანმა.