ერდოღანი რუსეთს ISIS-თან გარიგებაში ადანაშაულებს და მტკიცებულებების გამოქვეყნების პირობას დებს

მსოფლიო - 16:51, 03 Dec, 2015

3048

რუსეთის ბრალდებების საპასუხოდ, თურქეთის პრეზიდენტი, რეჯეპ ტაიპ ერდოღანი რუსეთს „ისლამურ სახელმწიფოსთან“ ნავთობ-გარიგებაში ადანაშაულებს და მტკიცებულებების გამოქვეყნების პირობას დებს.

ამის შესახებ AFP იტყობინება.

„ჩვენ გვაქვს მტკიცებულებები, რომელსაც მსოფლიოს ვაჩვენებთ“ - განაცხადა ერდოღანმა.

ერდოღანმა ერთ-ერთო სირიელი ბიზნესმენის ვინაობაც დაასახელა, რომელიც რუსულ პასპორტს ფლობს. ერდოღანის თქმით, ჯორჯ ჰასვანი ერთ-ერთია, რომელიც „ისლამური სახელმწიფოსგან“ ნავთობს ყიდულობს.

შეგახსენებთ, რუსეთმა თურქეთის ხელისუფლება ჯიჰადისტებთან ვაჭრობაში რამდენჯერმე დაადანაშაულა. რუსეთის თავდაცვის სამინისტროს მტკიცებით, მათ ამის დამადასტურებელი ფაქტებიც გააჩნიათ, რომლებიც დღეს წარადგინა. უწყებან კადრები გავრცელა, სადაც სირია-თურქეთის საზღვარზე ავტომობილებისა და ტექნიკის კოლონის გადაადგილებაა ასახული, რაც მათი თქმით, თურქეთის მიერ ისლამური სახელმწიფოსგან ნავთობის შესყიდვის ფაქტს ადასტურებს.

მოსკოვის მტკიცებით, ამ ვაჭრობის შედეგად მოგებას პირადად ერდოღანის ოჯახი იღებს. ბრალდებას თურქეთის პრეზიდენტი კატეგორიულად უარყოფს.

თავის მხრივ, თურქეთის პრეზიდენტმა რეჯეპ ტაიპ ერდოღანმა განაცხადა, რომ ის მზად არის თანამდებობიდან გადადგეს, თუკი ვლადიმერ პუტინის ბრალდებებები თურქეთის მიერ „ისლამური სახელმწიფოსგან“ ნავთობის შეძენის შესახებ დადასტურდა.

რუსეთ-თურქეთის ურთიერთობა 24 ნოემბრის შემდეგ დაიძაბა. თურქეთმა საჰაერო სივრცის დარღვევისთვის, რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. ოფიციალური მოსკოვი თურქეთის საზღვრის დარღვევას უარყოფს. პუტინის თქმით, ეს შემთხვევა იყო "ტერორისტების თანამზრახველების მიერ ზურგში განხორციელებული დარტყმაა". მისივე განცხადებით, აღნიშნული ქმედება რუსეთ-თურქეთის ურთიერთობაზე სერიოზულ გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა და უვიზო რეჟიმიც გააუქმა. დღეს გავრცელებული ინფორმაციით კი, რუსეთის მთავრობამ იმ თურქული პროდუქციის ჩამონათვალი დაამტკიცა, რომლის რუსეთში იმპორტიც აიკრძალება. სიაში მოხვედრილი სოფლის მეურნეობის, ნედლეულისა და მრეწველობის პროდუქცია რუსეთში 2016 წლის 1-ელი იანვრიდან ვეღარ შევა.

რაც შეეხება ერდოღანს, მისი თქმით, მსგავსი ქმედების განმეროების შემთხვევაში, თურქეთი ანალოგიურად მოიქცევა.