პუტინმა თურქეთის წინააღმდეგ სანქციებს ხელი მოაწერა

მსოფლიო - 23:27, 28 Nov, 2015

6005

რუსეთის ფედერაციის პრეზიდენტმა პუტინმა უკვე მოაწერა ხელი ბრძანებულებას, რომლის თანახმადაც თურქეთს ეკონომიკური სანქციები დაუწესდა, ხოლო თურქეთის მოქალაქეებს უვიზო მიმოსვლა აეკრძალათ.

დოკუმენტის ტექსტში, რომელიც კრემლის ოფიციალურ საიტზე გამოქვეყნდა ნათქვამია, რომ გარდა თურქეთიდან საქონლის იმპორტის აკრძალვისა, თურქულ ორგანიზაციებს აეკრძალებათ რუსეთში გარკვეული საქმიანობის განხორციელება. ეკონომიკური სანქციები არ შეეხება იმ საქონელს, რომელიც პირადი მოხმარებისთვის იქნება ქვეყანაში შეტანილი. ამასთან, კომპანიებს შეეზღუდებათ თუქეთის მოქალაქეების დასაქმება თავიანთ ფირმებში. ტუროპერატორებს ოფიციალურად აეკრძალათ თურქეთის საგზურების გაცემა. დოკუმენტი ასევე ითვალისწინებს რუსეთ-თურქეთს შორის ჩარტერული რეისების აკრძალვას.

შეგახსენებთ, რუსეთ-თურქეთის ურთიერთობა 24 ნოემბრის შემდეგ დაიძაბა. თურქეთმა საჰაერო სივრცის დარღვევისთვის, რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. ოფიციალური მოსკოვი თურქეთის საზღვრის დარღვევას უარყოფს. პუტინის თქმით, ეს შემთხვევა იყო "ტერორისტების თანამზრახველების მიერ ზურგში განხორციელებული დარტყმაა". მისივე განცხადებით, აღნიშნული ქმედება რუსეთ-თურქეთის ურთიერთობაზე სერიოზულ გავლენას იქონიებს. რუსეთმა თურქეთთან სამხედრო კონტაქტები უკვე გაწყვიტა.

რაც შეეხება ერდოღანს, მისი თქმით, მსგავსი ქმედების განმეროების შემთხვევაში, თურქეთი ანალოგიურად მოიქცევა.