"ერდოღანმა უძლეველ პუტინს საძირკველი შურყია, დღეს მისთვის თამაში დამთავრდა"

მსოფლიო - 21:20, 25 Nov, 2015

17138

სოციალურ ქსელში ბევრს წერენ იმის შესახებ, რომ თურქეთის საჰაერო სივრცის დარღვევისთვის, თურქეთის სამხედრო ავიაციის მიერ რუსული თვითმფრინავის ჩამოგდებით, ერდოღანმა უძლეველ პუტინს საძირკველი შეურყია.

სოციალურ ქსელში ბევრს მსჯელობენ 24 ნოემბერს მომხდარ ინციდენტთან დაკავშირებით. საზოგადოების ნაწილი თურქეთის პრეზიდენტს მხარდაჭერას უცხადებს, რადგან სირიის კონფლიქტში მონაწილე და მშვიდობიანი ხალხის მკვლელ რუსეთს ჭკუა ასწავლა.

აქტიურად ტრიალებს აცრემლებული პუტინისა და თვითმფრინავის კაბინაში მჯდონი ერდოღანის კარიკატურებიც.

განსაკუთრებული აქტიურობით გამოირჩევიან თვითერის მუსლიმი მომხმარებლები.

„დადგა დრო, პუტინს ვინმემ ჭკუა ასწავლოს. ზეწოლა დიდია, გაუძლებ ვოვა?“

„მე დავიბადე თურქეთში და საუდის არაბეთში გავიზარდე.ის ვინც, მუსლიმურ სამყაროში ირანს მოკავშირედ ირჩევს, საკუთარ ქვეყანას ჭაობში მიათრევს. დღეს, პუტინისთვის თამაში დამთავრდა.“

„ეს რუსული ოკუპაციისა და ირანის დომინანტობის დასასრულია“ - წერენ სოციალური ქსელის მომხარებლები.

ცნობილი არაბი ჟურნალისტი, ყატარის გაზეთის „ალ-შარქის“ მთავარი რედაქტორი ჯაბერალ ჰარმი კი თვითერზე რუსულ გამანადგურებელში მჯდომი პუტინის კარიკატურას აქვეყნებს, რომელსაც ცხვირთან თურქული რაკეტა აქვს მიბჯენილი.

თუმცა, ვლადიმერ პუტინს არც მხარდაჭერა აკლია. მომხმარებელთა ნაწილი, მას ჩამოგდებული თვითმფრინავისთვის შესაბიმისი პასუხის გაცემისკენ მოუწოდებენ, წინააღმდეგ შემთხვევაში პრესტიჟის შელახვას უწინასწარმეტყველებენ.

ნებისმიერ შემთხვევაში, რუსეთ-თურქეთს შორის არსებული დაძაბულობა არცერთ მხარეს არ აწყობს. ვლადიმერ პუტინმა განაცხადა, რომ სუ-24-ის ჩამოგდებას ორ ქვეყანას შორის სერიოზული შედეგები მოჰყვება, კონკრეტულად რა, არ დაუკონკრეტებია. თავის მხრივ რეჯეპ ტაიპ ერდოღანმა ხაზგასმით აღნიშნა, რომ რუსეთთან ვითარების ესკალაცია არ სურს და მისი ავიაცია მხოლოდ საზღვარს იცავდა.

ვინაიდან რუსეთ-თურქეთის ეკონომიკა მჭიდროდ არის დაკავშირებული ერთმანეთთან, რუსეთის მიერ შესაძლო სანქციები ორივე სახელმწიფოს ეკონომიკას დაარტყამს.

ენერგეტიკა, ტურიზმი, კაპიტალი, ვაჭრობა - ეს ის მიმართულებებია, რომლის შეზღუდვის შემთხვევაში ორივე ქვეყნის ეკონომიკას სერიოზული ზიანი მიადგება. რუსეთის მთლიანი ექსპორტის თითქმის 85 % თურქეთზე მოდის. სანქციების შემოღების შემთხვევაში, რუსეთი მთლიანად დაკარგავს თურქულ კაპიტალს, ინვესტიციებს, სამშენებლო კომპანიებს, სხვადასხვა ფირმებს, ფულად გზავნილებს, რაც ექსპერტების თქმით, რუსეთს წელიწადში 10 მილიარდი დოლარით დააზარალებს. გარდა ამისა, რუსეთს იმ კომპენსაციის გადახდა მოუწევს, რაც თურქულ ტურისტული კომპანიებს ტურების გაუქმებით მიადგება.

თავის მხრივ, ზარალი მიადგება თურქეთსაც. სავაჭრო პარტნიორებიდან, გერმანიის შემდეგ რუსეთი რიგით მეორე თურქეთისთვის, რუსი ტურისტების რაოდენობა კი თურქეთის კურორტებისთვის პირველ ადგილზეა. რაც შეეხება გაზს, 2013 წელს თურქეთის ბაზარზე რუსული გაზის წილმა 57% შეადგინა, რაც დიდად არ შეცვლილა გასულ წელს. თურქეთს ალტერნატიული გაზის მიღება აზერბაიჯანისა და ირანისგანაც შეუძლია, თუმცა ამ შემთხვევაში შემზღუდველი რესურსების ბაზა და ტრანსპორტირების შესაძებლობებია.

საერთაშორისო პოლიტიკურმა საზოგადოებამ უკვე გამოხატა საკუთარი პოზიცია სუ-24-ის ჩამოგდებასთან დაკავშირებით. ნატოს გენერალური მდივნის, იენს სტოლტენბერგის განცხადებით, ალიანსი თურქეთის გვერდით არის და პატივს სცემს ნატოს პარტნიორის ტერიტორიულ მთლიანობას. აშშ-ის პრეზიდენტის ბარაკ ობამას განცხადებით კი, თურქეთს როგორც ყველა სხვა სახელმწიფოს, აქვს უფლება დაიცვას თავისი ტერიტორია.

ხატია ლაღიძე