გამოიწვევს თუ არა რუსეთი თურქეთიდან ელჩს - "თურქეთმა წითელი ხაზი გადაკვეთა"

მსოფლიო - 13:38, 25 Nov, 2015

1724

რუსეთის სახელმწიფო სათათბიროს საერთაშორისო ურთიერთობის კომიტეტის ხელმძღვანელის - ალექსეი პუშკოვის შეფასებით, თურქეთმა რუსეთთან ურთიერთობაში წითელი ხაზი გადაკვეთა. პოლიტიკოსის თქმით, დიპლომატიური ურთიერთობები წყდება მაშინ, როცა ქვეყნები საომარ მდგომარეობაში არიან ან როცა ერთი სახელმწიფო, მეორის სახელმწიფო ხელისუფლებას არ აღიარებს. ამავდროულად პუშკოვი აღნიშნავს, რომ სიტუაცია ამ ეტაპზე არ არის იმგვარი, რომ თურქეთთან დიპლომატიური ურთიერთობის გაწყვეტა მოხდეს.

„არსებობს სხვა ნაბიჯები, რომლითაც ქვეყნები მსგავს მტრულ ქმედებებთან დაკავშირებით თავის დამოკიდებულებას გამოხატავენ. უპირველეს ყოვლისა ეს არის საკუთარი ელჩის გამოწვევა და იმ ქვეყნის ელჩისთვის, რომელმაც აგრესიული ქმედება ჩაიდინა, ქვეყნის დატოვების მოთხოვნა“- განაცხადა პუშკოვმა.

შეგახსენებთ, გუშინ თურქეთის სამხედრო ძალებმა რუსული ბომბდამშენი ჩამოაგდეს. ოფიციალური ანკარას განცხადებით, რუსულმა ბომბდამშენმა თურქეთის საჰაერო სივრცე დაარღვია და მიუხედავად მრავალგზის გაფრთხილებისა არ დაემორჩილა თურქული მხარის მოწოდებას ტერიტორია დაეტოვებინა, რის გამოც მისი ჩამოგდება მოხდა.