ISIS-ის წინააღმდეგ ერთობლივი ბრძოლის სტრატეგია - ფრანსუა ოლანდი ბარაკ ობამას შეხვდა

მსოფლიო - 23:10, 24 Nov, 2015

1142

როგორი იქნება თურქეთში მომხდარი ინციდენტის შემდეგ რუსეთის სტრატეგია სირიასთან მიმართებაში ჯერ უცნობია, დღეს კი საფრანგეთისა და აშშ-ს პრეზიდენტებს შორის შეხვედრა შედგა. პარიზის ტერორისტული აქტების შემდეგ ფრანსუა ოლანდი და ბარაკ ობამა თეთრი სახლის ოვალურ დარბაზში ერთმანეთს შევდნენ, რის შემდეგაც მედიისთვის განცხადებები გააკეთეს. მთავარი განსახილველი თემები ISIS-ის წინააღმდეგ ერთობლივი სტრატეგიის შემუშავება და გამოძიებაში შეერთებული შტატების დახმარება იყო. უკვე ცნობილია, რომ შეერთებული შტატების შემდეგ ფრანსუა ოლანდს მოლაპარაკება დიდი ბრიტანეთის, ხოლო შემდეგ რუსეთის ლიდერებთან ექნება.

ფრანსუა ოლანდმა მადლობა გადაუხადა ამერიკელ ხალხს და აშშ-ს ხელისუფლებას სოლიდარობისთვის.

,,ბარაკ ობამამ გვიან ღამით დამირეკა და მითხრა, რომ მზად იყო ნებისმიერი სახის დახმარებისთვის. ჩვენი საერთო ვალდებულებაა, ტერორიზმს ვებრძოლოთ. ამერიკელი ხალხმა ფრანგ ხალხს ამ დღეებში უდიდესი თანადგომა აგრძნობინა. რა თქმა უნდა, ჩვენ სხვადასხვა ისტორია და კულტურა გვაქვს, მაგრამ ვიზიარებთ თავისუფლების რწმენას. პარიზის თავდასხმებით ტერორისტების სამიზნე მთელი მსოფლიო გახდა. შეხვედრაზე დავადასტურეთ ჩვენი განზრახვა, რომ ვებრძოლოთ ტერორიზმს ყველგან. არ მივცემთ მათ უფლებას, მსოფლიოს ზიანი მიაყენონ. ისინი უნდა განადგურდნენ. კოალიციის გაძლიერებასთან ერთად, ჩვენ ასევე მხარს დავუჭერთ ყველას, ვინც ისლამურ სახელმწიფოს ადგილზე ებრძვის," - აღნიშნა ფრანსუა ოლანდმა.

ერთობლივ პრესკონფერენციაზე განცხადება გააკეთა ამერიკის შეერთებული შტატების პრეზიდენტმა, ბარაკ ობამამ.

"შეერთებული შტატები საფრანგეთის გვერდით დგას მშვიდობიან დროსაც და მაშინ, როცა ქვეყანას უჭირს. ჩვენ კიდევ ერთხელ გამოვხატავთ მწუხარებას პარიზის თავდასხმების გამო. საფრანგეთი და ამერიკა ერთმანეთის გვერდით დგანან ჩვენი ხალხის დასაცავად. ახლა მსოფლიოსთვის მნიშვნელოვანი მომენტი დგას. ისალმური სახელმწიფო ჩვენთის დიდ საფრთხეს წარმოადგენს და ერთად უნდა ვებრძოლოთ მას. სწორედ ერთიანობაა მიზეზი, რის გამოც ჩვენ ახლა აქ, ერთმანეთის გვერდით ვდგავართ. საფრანგეთი ჩვენი უძველესი მოკავშირეა. პარიზის ტერაქტებმა ჩვენს ისევე შეგვძრა, როგორც თქვენ. დღევანდელ შეხვედრაზე განვიხილეთ კოალიციის ბრძოლა ISIS-ის წინააღმდეგ. შევთანხმდით, რომ კიდევ უფრო მეტი უნდა გავაკეთოთ. მეტად უნდა ვიმუშაოთ, რომ თავიდან ავიცილოთ მოსალოდნელი თავდასხმები. ვისაუბრეთ სირიის კრიზისზეც. მიგვაჩნია, რომ რუსეთმა ამ პროცესში უფრო მეტად კონსტრუქციული როლი უნდა შეასრულოს," - განაცხადა ამერიკის პრეზიდენტმა.

შეხვედრას აშშ-ს ვიცე-პრეზიდენტი ჯო ბაიდენიც ესწრებოდა, რომელიც ტელეფონით ესაუბრა ერაყის პრემიერ-მინისტრს, რათა ISIS-ის წინააღმდეგ 65 წევრიანი მობილიზების დეტალები განეხილა. მოლაპარაკება გამართეს თეთრ სახლში ამერიკის და საფრანგეთის თავდაცვის უწყების ხელმძღვანელებმა.