თურქეთის მოთხოვნით, რუსული თვითმფრინავის ჩამოგდებასთან დაკავშირებით, ნატო საგანგებო სხდომას მართავს

მსოფლიო - 16:40, 24 Nov, 2015

3167

თურქეთ-სირიის საზღვართან რუსული სამხედრო თვითმფრინავის ჩამოგდების ფაქტს, ნატო გამოეხმაურა.

„ნატო თვალყურს ადევნებს არსებულ სიტუაციას, ჩვენ მუდმივ კონტაქტში ვიმყოფებით თურქეთის ხელისუფლებასთან“ - ნათქვამია ალიანსის განცხადებაში.

როგორც „ბლუმბერგი“ იტყობინება, ალიანსის წარმომადგენლის განცხადებით, თურქეთის თხოვნით 17:00 საათზე ნატოს საგარეო საქმეთა მინისტრების საგანგებო სხდომა გაიმართება.

შეგახსენებთ, რუსული სამხედრო თვითმფრინავი სუ-24 თურქმა სამხედროებმა თურქეთ-სირიის საზღვართან დღეს ჩამოაგდეს.

ოფიციალური ანკარის ინფორმაციით, თვითმფრინავმა თურქეთის საჰაერო სივრცე დარღვია. ჩამოგდებამდე, ხუთი წუთის განმავლობაში კი, თურქული საჰაერო სივრცის დარღვევის შესახებ სუ-24 10-ჯერ გააფრთხილეს.

რუსეთის თავდაცვის სამინისტრო სუ-24-ის კატასტროფის ფაქტს ადასტურებს, თუმცა აცხდებს, რომ სამხედრო თვითმფრინავი სირიის ტერიტორიაზე იმყოფებოდა. მედიაში გავრცელებული ცნობით, პილოტებმა კატაპულტირება მოახერხეს. ერთ-ერთი პილოტი ადგილობრივებმა ჩაიგდეს ხელში, ერთი კი გარდაიცვალა. პილოტების მდგომარეობის შესახებ ინფორმაცია ოფიციალურად არ დასტურდება.