რუსეთში პანიკაა - ქრონიკული საბანკო კრიზისი მწვავე ფორმებს იძენს

მსოფლიო - 01:15, 21 Nov, 2015

4229

რუსეთის საბანკო საზოგადოების ავტორიტეტული წარმომადგენლების აზრით, მოსალოდნელია ისეთი მასშტაბური საბანკო კრიზისის განვითარება, როგორიც ქვეყანას არ უნახავს ბოლო 20 წლის განმავლობაში. სიტუაციას კიდევ უფრო ამძიმებს ის, რომ აღნიშნულ კონცეფციას იზიარებენ საკმაოდ ავტორიტეტული ადამიანები. გერმან გრეფი, რომელიც ქვეყანაში უმსხვილეს რუსეთის ,,შემნახველ ბანკს“ ხელმძღვანელობს და რომელიც იმყოფება რუსეთის ,,ცენტრალური ბანკის“ კონტროლის ქვეშ, ემხრობა მოსაზრებას მასშტაბური საბანკო კრიზისის შესახებ. ,,მე არ მახსოვს, რომ ქვეყანაში ყოფილიყო ასეთი სიტუაცია მოყოლებული 1990 წლიდან. ასეთი არ ყოფილა არასოდეს. ნებისმიერ შემთხვევაში ბოლო 20 წელი მაინც“ - განუცხადა მან ჟურნალისტებს. მას არ ეთანხმება პუტინთან დაახლოებული ბანკის ხელმძღვანელი ანდრეი კოსტინი და თავად ვლადიმერ პუტინი. ,,სიტუაცია, რა თქმა უნდა, არ არის მარტივი - მაგრამ ყველაფერი ექვემდებარება კონტროლს“.

ყველასათვის მოულოდნელად გერმან გრეფის პოზიცია გაიზიარა რუსეთის უშიშროების საბჭოს მდივანმა, წარსულში ეფესბეს მეთაურმა პატრუშევმა. პეტროზავოდსკში სამუშაო ვიზიტის დროს, მან განაცხადა ,,ჩვენ ვხედავთ, რომ დღეს ეკონომიკა და ქვეყნის სოციალური სფერო განიცდის მნიშვნელოვან დაძაბულობას. იკვეთება ფინანსური სისტემის არასტაბილურობის ელემენტები“. ყველაფერი კიდევ უფრო დამაბნეველი ხდება, თუ გავითვალისწინებთ, რომ ჯერ კიდევ ოქტომბერში რუსეთის უშიშროების საბჭოს მეთური ვლადიმერ პუტინი აცხადებდა, რომ კრიზისის პიკი გავლილია ქვეყანაში, და არაერთხელ შეაქო პერსონალურად ცენტრალური ბანკის ხელმძღვანელი ელვირა ნაბიულინა ფინანსური სექტორის სტაბილიზაციისთვის.

,,ნიუპოსტი" მოსკოვში მცხოვრებ ქართველებს დაუკავშირდა, რომლებიც ადასტურებენ, რომ სოციალური კრიზისის ახალი ტალღა უკვე მოსახლეობის დონეზეც იგრძნობა.