ISIS-იზე გამარჯვებამდე ბაშარ ასადი პოსტის დატოვებას გამორიცხავს

მსოფლიო - 12:05, 19 Nov, 2015

1800

სირიის პრეზიდენტი, ბაშარ ალ-ასადი, „ისლამურ სახელმწიფოზე“ გამარჯვებამდე, პოსტიდან მის შესაძლო გადადგომას გამორიცხავს.

ამის შესახებ ასადმა იტალიურ ტელეკომპანია „რაისთან“ ინტერვიუში განაცხადა.

სირიის პრეზიდენტის თქმით, პოლიტიკური პროცესი დასრულებულად ვერ ჩაითვლება, სანამ ტერორისტები სირიის ტერიტორიის ნაწილს აკონტროლებენ.

ასადი, ტერორისტებიად არა მხოლოდ "ისლამურ სახელმწიფოს " მებრძოლებს, არამედ მთავრობის წინააღმდეგ მოქმედ შეიარაღებულ ოპოზიციასაც მიიჩნევს.

„არ შეიძლება ოპოზიციად ჩაითვალოს ის, ვინც იარაღიდან ისვრის“ - განაცხადა ასადმა.

სირიის პრეზიდენტი დარწმუნებულია, რომ „ისლამურ სახელმწიფოზე“ გამარჯვების შემდეგ, ხელისუფლების გადაცემისა და ნებისმიერი სახის რეფორმის საჭიროების შემთხვევაში საკმარისი იქნება ერთი ან ორი წელი. თუმცა, ბაშარ ალ-ასადმა ახალ საპრეზიდენტო არჩევნებში მონაწილეობაც არ გამორიცხა.
"ამ საკითხში წითელი ხაზი არ არსებობს. თუ სირიელები პრეზიდენტად ამირჩევენ, მათ კარგი მომავალი ელით" - განაცხადა ასადმა და დასძინა, რომ ხელისუფლების სათავეში არჩევნების გარეშე დარჩება, მისთვის დიდი პოლიტიკური შეცდომა იქნებოდა.