ამინდის პროგნოზის საერთაშორისო პორტალების მონაცემები მოცემული დროისთვის საქართველოს დედაქალაქში არსებულ რეალურ სურათს ემთხვეოდა: ქარი თანდათან ძლიერდებოდა და 02.00 სთ-ისთვის მისი სიჩქარე 18 მ/წმ-ს აღწევდა. ამასთან, დედაქალაქში მცხოვრები ინტერნეტმომხმარებლები მიუთითებენ, რომ მასალის გამოქვეყნების დროისთვის ქარი განსაკუთრებით გაძლიერდა დიღომში, სანზონაში, თემქის, გლდანის დასახლებებსა და ნაძალადევის რაიონში, ასევე საბურთალოს უმეტეს ნაწილში. შედარებით დაბალი სიჩქარის ქარზე იტყობინებიან ჩუღურეთის, მთაწმინდის, ვაკის მცხოვრებლები. ზოგან ქარს წვიმა ერთვის თან, თუმცა თბილისში ამ დროისთვის ყველგან არ წვიმს. ჰაერის ტემპერატურა ცელსიუსით +6-7 გრადუსია.

რაც შეეხება რეგიონებს, ჯერჯერობით ამინდის განსაკუთრებული გაუარესება არ იგრძნობა ბათუმში, სადაც სამაშველო სამსახურები საგანგებო რეჟიმზე არიან გადასული. ძლიერი ქარი და წვიმაა ქუთაისშიც, ხოლო ზუგდიდში წვიმს და ჰაერის ტემპერატურა +7 გრადუსია.

შეგახსენებთ, რომ სინოპტიკოსთა მონაცემებით, თბილისსა და საქართველოს რამდენიმე სხვა ქალაქში ორშაბათიდან ძლიერი ქარი (ზოგიერთი მონაცემებით, 30 მ/წმ) და წვიმაა მოსალოდნელი.