Anonymous-ის ჰაკერებმა ტერორისტების 5 000-ზე მეტი თვითერის ექაუნთი გატეხეს

მსოფლიო - 11:11, 18 Nov, 2015

4905

ჰაკერთა ჯგუფმა Anonymous-მა, რომელმაც პარიზის ტერაქტების შემდეგ, "ისლამურ სახელმწიფოს" ომი გამოუცხადა, ტერორისტების 5 000-ზე მეტი თვითერის ექაუნთი გატეხეს.

ჯგუფის წარმომადგენლის, ალექს პაუჩერის განცხადებით, Anonymous-ი ნებისმიერი საშუალებით დაბლოკავს ტერორისტების საქმიანობას ინტერნეტში.

მედიაში გავრცელებული ცნობით, ისლამური სახელმწიფოს“ წინააღმდეგ ბრძოლაში Anonymous-ს სხვა ჰაკერული ორგანიზაციები - GhostSec და Ctrlsec შეუერთდნენ. გავრცელებული ცნობით, მათ ტერორისტების 101 000 თვითერის პროფილი და 5 900პროპაგანდისტული ვიდეო გამოავლინეს.

ჰაკერთა ჯგუფმა Anonymous-მა "ისლამურ სახელმწიფოს" ომი გამოუცხადა. ჰაკერებმა ვიდეო YouTube-ზე, პარიზის ტრაგედიის შემდეგ ატვირთეს.

„თქვენ უნდა იცოდეთ, რომ აუცილებლად გიპოვით და არ გაგიშვებთ. ჩვენ დავიწყებთ ყველაზე მასშტაბურ ოპერაციას თქვენ წინააღმდეგ. დაელოდეთ კიბერთავდასხმებს. ომი გამოცხადებულია, მოემზადეთ. ფრანგი ხალხი თქვენზე ძლიერია და ამ ძალადობის შემდეგ კიდევ უფრო გაძლიერდება" - აცხადებს ნიღბიანი პირი.

აღსანიშნავია, რომ ეს პირველი შემთხვევა არ არის, როდესაც ჰაკერთა დაჯგუფება "ისლამურ სახელმწიფოს" დაემუქრა. მსგავსი შინაარსის ჩანაწერები Charlie Hebdo-ზე თავდასხმის შემდეგაც გაავრცელეს.