რუსული ლაინერის კატასტროფაში დამნაშავე პირებს დედამიწის ნებისმიერ წერტილში ვიპოვით

რუსული ლაინერის კატასტროფაში დამნაშავე პირებს დედამიწის ნებისმიერ წერტილში ვიპოვით - პუტინი

მსოფლიო - 14:30, 17 Nov, 2015

1653

რუსეთის უშიშროების ფედერალურმა სამსახურმა, ეგვიპტეში, სინაის სახევარკუნძულზე, რუსული სამგზავრო ლაინერის კატასტროფასთან კავშირში მყოფი ტერორისტების შესახებ ინფორმაციის მიწოდებისთვის 50 მილიონი აშშ დოლარის ჯილდო დააწესა.

რუსეთის პრეზიდენტმა, ვლადიმერ პუტინმა კი განაცხადა, რომ ყველა ვინც თვითმფრინავზე განხორციელებულ ტერაქტთან კავშირში მყოფ პირებს დახმარებას გაუწევს, პასუხისმგებლობა დაეკისრება. ამის შესახებ პუტინმა ავიალაინერის კატასტროფის გამოძიების შედეგებზე მიძღვნილ თათბირზე განაცხადა.

"ტერორისტებს, რომლებსაც რუსული სამგზავრო თვითმფრინავის აფეთქებასთან აქვთ კავშირი, დედამიწის ნებისმიერ წერტილში იპოვიან და უმკაცრესად დაისჯებიან" - დასძინა რუსეთის პრეზიდენტმა.

რამდენიმე წუთის წინ გავრცელებული ცნობით, რომ ეგვიპტეში შარმ ელ-შეიხის აეროპორტის ორი თანამშრომელი დააკავეს. "როიტერის" ცნობით, დაკავებულები იმ პირებს დაეხმარნენ, რომლებმაც თვითმფრინავის ბორტზე ბომბი დაამონტაჟეს. დაკავებულთა ვინაობა ჯერჯერობით უცნობია.

შეგახსენებთ,რუსეთის ფედერალური უსაფრთხოების სამსახურმა ეგვიპტეში , რუსული სამგზავრო ლაინერის A321-ის კატასტროფას ტერაქტის კვალიფიკაცია მიანიჭა.

რუსული ავიაკომპანია "კოგალიმავიას" ლაინერი Airbus А-321 ეგვიპტის ტერიტორიაზე, სინაის ნახევარკუნძულზე 31 ოქტომბერს ჩამოვარდა.

თვითმფრინავი აფრენიდან დაახლოებით 23 წუთში რადარებიდან გაუჩინარდა. ლაინერი შარმ ელ-შეიხი-სანკტ-პეტერბურგის რეისს ასრულებდა.

ავიაკატასტორისას ბორტზე 224 ადამიანი - 217 მგზავრი, მათ შორის 17 ბავშვი და ეკიპაჟის 7 წევრი იმყოფებოდა. ყველა მათგანი დაიღუპა.