პუტინმა ”დიდი ოცეულის” წევრები ISIS-თან ნავთობგარიგებებში დაადანაშაულა

მსოფლიო - 01:38, 17 Nov, 2015

6122

რუსეთის პრეზიდენტის ვლადიმერ პუტინის თქმით ”დიდი ოცეულის” წევრი ზოგიერთი ქვეყანა ”ისლამურ სახელმწიფოსთან” ნავთობის საკითხთან დაკავშირებით გარიგებებს აწარმოებს. აღნიშნულ თემასთან დაკავშირებით პუტინმა G20-ის სამიტის დასრულებისას გამართულ პრესკონფერენციაზე ისაუბრა.

ჯიჰადისტების დაფინანსების წყაროების შესახებ საუბრისას პუტინმა განაცხადა, რომ კოსმოსიდან გადაღებულ კადრებში ნათლად ჩანს თუ რა მასშტაბებს აღწევს ISIS--თან ნავთობით და ნავთობპროდუქტებით ვაჭრობა. პუტინის განცხადებით სურათებზე აღბეჭდილია ნავთობით დატვირთული ავტომობილების ათეულობით კილომეტრიანი კოლონები.

რუსეთის პრეზიდენტის თქმით, კრემლში დარწმუნებულნი არიან, რომ ამ მეთოდით ”ისლამური სახელმწიფო” დაფინანსებას მსოფლიოს 40 ქვეყნისგან იღებს, მათ შორის კი დიდი ოცეულის წევრი ქვეყნებიც არიან.

პუტინის თქმით, ტერორიზმთან საბრძოლველად ერთობლივი მოქმედებაა საჭირო. რუსეთის ფედერაციის მეთაური იმედოვნებს, რომ საერთაშორისო ანტიტერორისტულ კოალიციის შექმნაზე შეთანხმება მოხდება, მათ შორის ამერიკის შეერთებულ შტატებთანაც.

”აშშ-მ თავდაპირველად უარი განაცხადა ისლამური სახელმწიფოს წინააღმდეგ თანამშრომლობაზე, მაგრამ ახლა ხდება იმის გაცნობიერება, რომ აუცილებელია ერთობლივი ქმედებები”- განაცხადა პუტინმა.