საფრანგეთი ომის მდგომარეობაშია- ფრანსუა ოლანდმა საფრანგეთის ეროვნულ ასამბლეას მიმართა

მსოფლიო - 21:22, 16 Nov, 2015

3962

საფრანგეთის აღმასრულებელ და საკანონმდებლო ორგანოს წარმომადგენლების წინაშე გამოსვლისას საფრანგეთის პრეზიდენტმა გააკეთა განცხადება, რომ პარიზში განხორციელებული ტერორისტული თავდასხმის შემდეგ ქვეყანა ომის მდგომარეობაში იმყოფება.

პრეზიდენტის თქმით, ის პარლამენტში საგანგებო მდგომარეობასთან დაკავშირებით კანონპროექტს წარადგენს, რომელიც თავდაპირველად სამ თვემდე ვადით განისაზღვება. ამასთანავე ოლანდის განცხადებით საფრანგეთი „ისლამური სახელმწიფოს“ გასანადგურებლად აქტიურად იმოქმედებს.

საფრანგეთის ლიდერმა დაადასტურა, რომ ის მომდევნო დღეებში აშშ-ისა და რუსეთის პრეზიდენტებთან შეხვედრას აპირებს. მისი თქმით ტერორისტებთან საბრძოლველად აუცილებელია ერთიანი დიდი კოალიციის შექმნა.

ფრანსუა ოლანდმა ევროკავშირს საზღვრების გამაგრებისკენაც მოუწოდა, მისი თქმით ეს აუცილებელია რათა საზღვრები ევროკავშირის შიგნით არ გაჩნდეს, რაც კავშირის დაშლას შეუწყობს ხელს.

ოლანდის თქმით გაიზრდება სპეცსამსახურების დაფინანსება და ამასთანავე ავიამზიდი „შარლ დე გოლი“ ხუთშაბათს ხმელთაშუაზღვის აღმოსავლეთ ნაწილში გაემგზავრება, რათა ისლამური სახელმწიფოს წინააღმდეგ სამხედრო კამპანია გააძლიეროს.

ეროვნული ასამბლეის გაერთიანებული სხდომა, რომელიც საფრანგეთის პარლამენტის ორივე პალატის შეკრებას გულისხმობს, გამონაკლის შემთხვევებში ხდება.