"დახოცილ ახალგაზრდებში გაუნძრევლად ვიწექი, მათი სახე არასოდეს დამავიწყდება"

"დახოცილ ახალგაზრდებში გაუნძრევლად ვიწექი, მათი სახე არასოდეს დამავიწყდება" - ტერაქტს გადარჩენილი გოგონა

მსოფლიო - 17:35, 16 Nov, 2015

19465

პარიზის ტერაქტს გადარჩენილი 22 წლის იზაბელ ბოვერი თავდასხმის შემზარავ წუთებს იხსენებს. "ბატაკლანის" დარბაზში, კონცერტზე მყოფი გოგონა მსოფლიოს ფეისბუკის გვერდიდან მიმრთავს.

„ ვერასოდეს წარმოიდგენ, რომ ეს შესაძლოა შენ შეგემთხვას. ეს მხოლოდ პარასკევი საღამო იყო. კონცერტი, სასიამოვნო ატმოსფერო და ბედნიერი ხალხი. მაშინაც კი, როდესაც სროლა დაიწყო, გვეგონა ეს შოუს ნაწილი იყო.

ეს არ იყო მხოლოდ ტერორისტული აქტი, ეს იყო ხოცვა. ათობით ადამიანი ჩემ თვალწინ მოკლეს. იატაკზე სისხლის გუბეები დააყენეს. მამაკაცები ცხარე ცრემლებით ტიროდნენ, მკლავებში კი მოკლული შეყვარებულები ესვენათ“ - წერს იზაბელა.

მისი თქმით, მასშტაბურ ხოცვას მხოლოდ იმიტომ გადაურჩა, რომ სიკვდილის ინსცენირება მოაწყო.

„ვიწექი დახოცილ ახალგაზრდებს შორის და ვცდილობდი არ გავნძრეულვიყავი, არ მეტირა, ტერორისტების ყურადღება რომ არ მიმეპყრო. მაგრამ მაშინ, როდესაც ვგრძნობდი შემდეგი მე ვიქნებოდი და კანკალმა ამიტანა, ახალგაზრდა მამაკაცი სხეულით გადამეფარა, პირზე ხელი ამაფარა, რომ არ მეტირა და სიკვდილს გადამარჩინა. მთელი ცხოვრება მემახსოვრება მათი სახე, ვინც ჩვენს დასახოცად მოვიდა“ - ამბობს გოგონა.

მისი თქმით, ვერასოდეს დაივიწყებს იმ ჰუმანურობასა და თანადგომას , რაც უცნობმა ადამიანებმა გამოიჩინეს.

„არასოდეს დამავიწყდება ქალი, რომელმაც საკუთარ სახლის კარები ჩვენთვის გააღო. მამაკაცი, რომელმაც ტანსაცმელი გვიყიდა, რადგან მთლიანად სისხლში ვიყავით ამოსვრილები. მათ დამარწმუნეს, რომ ყველაფრის მიუხედავად მსოფლიო მშვენიერია და ცხოვრება უნდა განვაგრძოთ. მაშინ, როდესაც სისხლის გუბეში ვიწექი, ვფიქრობდი ყველაზე, ვისთვისაც კი ოდესმე მითქვამს, რომ მიყვარს და მივხვდი, რომ ამქვეყნად ყველაზე მნიშვნელოვანი ჩვენი სიცოცხლეა. მიუხედავად იმისა, რაც ჩემს თავს ხდებოდა, მათ შემინარჩუნეს რწმენა , რომ ის ტერორისტები ჩვენზე ვერ გაიმარჯვებენ. პარასკევის ღამემ ბევრი ჩვენგანის ცხოვრება სამუდამოდ შეცვალა და ახლა, ჩვენ უნდა შევეცადოთ ვიყოთ იმაზე უკეთესები, ვიდრე ვიყავით მათთვის, ვინც უდანაშაული მსხვერპლი გახდა. მათთვის, ვინც ვერასოდეს აისრულებს თავის სურვილებს. მშვიდობით განისვენეთ, ანგელოზებო - წერს იზაბელა.