სირიის კრიზისის შესახებ ვენის დისკუსიის მონაწილეებმა პოლიტიკური პროცესის აღდგენის 18 თვიანი გეგმა შეიმუშავეს. ეს პირველი შედეგიანი მოლაპარაკებებია სირიის კრიზისთან დაკავშირებით.

დოკუმენტის თანახმად, უახლოესი 6 თვის განმავლობაში სირიაში გარდამავალი მთავრობა უნდა ჩამოყალიბდეს და ახალი კონსტიტუცია მომზადდეს. რის შემდეგადაც ქვეყანაში ახალი სამართლიანი არჩევნები ჩატარდება.

ერთადერთი საკითხი, რომელზეც მოლაპარაკების მონაწილეები ვერ შეთანხმდნენ სირიის მოქმედი პრეზიდენტის ბედია. შეერთებული შტატების, რუსეთის, ევროკავშირისა და ახლო აღმოსავლეთის ქვეყნების წარმომადგენლებს ბაშარ ალ ასადის მომავალზე ერთიანი პოზიცია ჯერჯერობით არ აქვთ, თუმცა დისკუსიის ყველა მონაწილე თანხმდება, რომ ისლამური სახელმწიფოს დამარცხება მხოლოდ ერთიანი ძალებითაა შესაძლებელი.