პარიზის ტერაქტებზე პასუხისმგებლობა „ისლამურმა სახელმწიფომ“ აიღო

მსოფლიო - 11:04, 14 Nov, 2015

5379

პარიზში განხორციელებულ ტერაქტების სერიაზე პასუხისმგებლობა რადიკალურმა ისლამისტურმა დაჯგუფება „ისლამურმა სახელმწიფომ“ აიღო. "ბიბისის" ცნობით, ჯიჰადისტებმა აუდიომიმართვა და განცხადება ფრანგულ და არაბულ ენებზე გაავრცელეს, რომელშიც ნათქვამია, რომ თავდასხმების მიზანი საფრანგეთისთვის იმის დემონსტრირება იყო, რომ ის კვლავ რჩება მთავარ სამიზნედ. მათი თქმით, ეს არის საპასუხო ქმედება მუჰამედ წინასწარმეტყველის შეურაცხყოფისა და საერთაშორისო კოალიციის მეირ განხორციელებული ავიაიერიშებისა. განცხადების თანახმად, ტერაქტები წინასწარ კარგად შერჩეულ სამიზნე ადგილებზე, რვა ძმის მეშვეობით განხორციელდა, რომლებიც ასაფეთქებელი ქამრებით და ცეცხლსასროლი იარაღებით იყვნენ შეიარაღებულნი. "ჩვენ მაშინაც გაკვირდებით, როდესაც გძინავთ. დღეს კი ჩვენ თქვენ სიკვდილი მოგიტანეთ" - ნათქვამია განცხადებაში.

საფრანგეთის პროკურატის მიერ გავრცელებული ოფიციალური განცხადების თანახმად, ამჟამინდელი მონაცემებით , გუშინ განხორციელებულ ტერქტებს 128 ადამიანი ემსხვერპლა.

მედიის ინფორმაციით კი, მსხვერპლი გაცილებით დიდი და 153 ადამიანს შეადგენს.

2015 წლის 13 ნოემბრის პარასკევს, საფრანგეთის დედაქალაქში ერთდროულად 6 ტერაქტი მოხდა. შეიარაღებული პირები საკონცერტო დარბაზს, სტადიონსა და რესტორნებს დაესხნენ თავ. დაშავებულია 220-მდე ადამიანი, მათგან 90 მდგომარეობა მძიმეა.

ყველაზე დიდი მსხვერპლი პარიზის ცენტრში ბატაკლანის საკონცერტო დარბაზში მომხდარ თავდასხმას მოჰყვა, სადაც 100 ადამიანი დაიღუპა. ტერორისტები შენობაში ამერიკული როკ ბენდის კონცერტის დროს შეიჭრნენ და მძევლები აიყვანეს. ანტიტერორისტულმა ძალებმა შენობაზე იერიში მიიტანეს, რა დროსაც ტერორისტების ნაწილმა თავი აიფეთქა, რამდენიმე თავდამსხმელი კი სამართალდამცველებმა მოკლეს და გადარჩენილი მძევლები გაათავისუფლეს.

3 ძლიერი აფეთქება მოხდა პარიზის გარეუბანში, სტადიონთანაც, სადაც საფრანგეთის პრეზიდენტი ფრანსუა ოლანდი და გერმანიის საგარეო საქმეთა მინისტრი, ფრანკ ვალტერ-შტაინმაიერი იმყოფებოდნენ, რომლებიც საფრანგეთი-გერმანიის მეგობრულ მატჩს უნდა დასწრებოდნენ. მას შემდეგ, რაც ფრანსუა ოლანდმა სტადიონი დატოვა, მან ქვეყანაში საგანგებო სიტუაცია გამოაცხადა და საზღვრები ჩაკეტა.

ტერაქტების შედეგად 8 ტერორისტი დაიღუპა. მათგან 7-მა თავი აიფეთქა.

პოლიცია პარიზის მოსახლეობას ქუჩაში გამოსვლისგან თავის შეკავებისკენ მოუწოდებს. ქალაქის სხვასხვა რაიონებში გაგზავნილია 2 ათასამდე სამხედრო.

საფრანგეთის პრეზიდენტის განცხადებით , ხელისუფლება დამნაშავეების მიმართ დაუნდობელი იქნება. ცოტა ხნის წინ გაკეთებული განცხადებით, ფრანსუა ოლანდმა ტერქტების ორგანიზებაში სწორედ ISIS დაადანაშაულა.

"ეს არის ომის აქტი, ამ თავდასხმის უკან ტერორისტული არმია, "ისლამური სახელმწიფო", ჯიჰადისტები დგანან, რომლებიც იმ ფასეულობების წინააღმდეგ გამოდიან, რომელსაც მთელ მსოფლიოში ვიცავთ" - განაცხადა ოლანდმა.